ރ. މީދޫގައި ތަރައްޤީކުރާ ހޮސްޕިޓަލް ބިންގާ އިއްޔެ އަޅައިފިއެވެ.
މީދޫގައި ތަރައްޤީކުރާ ހޮސްޕިޓަލުގެ މަސައްކަތް ހެލްތް މިނިސްޓްރީން ޙަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށެވެ.
މިކަމާ ގުޅިގެން މީދޫގައި އިއްޔެ ބޭއްވި ރަސްމިއްޔާތުގައި، މި ހޮސްޕިޓަލު ބިންގާ އަޅުއްވައި ދެއްވީ ހެލްތު މިނިސްޓަރު ޢަބްދުﷲ ނާޒިމް އިބްރާހިމާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މެނޭޖިންގ ޑިރެކްޓަރު އިބްރާހިމް ނަޒީމާއި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އަޙްމަދު ޒާހިރެވެ.
ރ.މީދޫ ހޮސްޕިޓަލް އިމާރާތް ކުރުމުގެ އަމަލީ މަސައްކަތް މިއަދު ފަށައިފިއެވެ. މި މަޝްރޫޢުގެ އަމަލީ މަސައްކަތް ފައްޓަވައިދެއްވީ މިނިސްޓަރ އޮފް ހެލްތް އަބްދުﷲ ނާޡިމް އިބްރާހީމްއެވެ. އަދި އަރިހުގައި މަޑުއްވަރީ ދާއިރާގެ ޢިއްޒަތްތެރި ރައްޔިތުންގެ މަޖިލީހުގެ މެންބަރު އަޙްމަދު ޒާހިރު އާއި… pic.twitter.com/gfMeW8xRZI
— Road Development Corporation Ltd (@rdcmaldives) March 16, 2026
މީދޫގައި ޒަމާނީ ފެންވަރުގެ ރަނގަޅު ހޮސްޕިޓަލެއް ތަރައްޤީކުރުމުގެ މަސައްކަތް ހެލްތް މިނިސްޓްރީން އާރްޑީސީއާ ޙަވާލުކޮށްފައިވަނީ މިދިޔަ 2025 ވަނަ އަހަރުގެ މެއި މަހުގެ ތެރޭގައެވެ. މި މަޝްރޫޢުގެ ދަށުން އެ ރަށުގައި ތަރައްޤީކުރުމަށް ހަމަޖެހިފައިވަނީ 30 އެނދުގެ ހޮސްޕިޓަލެކެވެ. މި ހޮސްޕިޓަލް ތަރައްޤީކޮށް ނިމޭއިރު ހޮސްޕިޓަލުގައި ޞިއްޙީ ޚިދުމަތްތަކަށް ބޭނުންވާނެ ހުރިހާ ވަސީލަތްތަކެއް ހުންނާނެއެވެ. އެގޮތުން ބަލިމީހުން ބަލާ ކޮޓަރިތަކާއި، އޮޕަރޭޝަން ތިއޭޓަރާއި، ލޭބަރ ރޫމް ފަދަ މުހިންމު ޚިދުމަތްތައް ހިމެނެއެވެ.
ރާއްޖޭގެ ޞިއްޙީ ދާއިރާ ކުރިއެރުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަރަށް ބޮޑު އަހައްމިއްޔަތު ކަމެއް ދެއްވައިގެން ކުރަމުން އަންނަ މަސައްކަތެކެވެ.
