ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބާ ގުޅިގެން ކެންޑިޑޭޓުންނަށް ތާއީދު ހޯދުމަށް މަސައްކަތް ކުރާއިރު، އެންޓި-ކެމްޕެއިން ކުރުމާއި، އެއްވެސް މީހެއްގެ އަބުރަށް އުނިކަމެއް އަތުވެދާނެ ފަދަ ކަންކަން ނުކުރުމަށް އިލެކްޝަންސް ކޮމިޝަން (އީސީ) އިން އިލްތިމާސްކޮށްފިއެވެ.
މިކަމާ ގުޅިގެން އީސީން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، ކެންޑިޑޭޓެއްގެ ޙައްޤަކަށް އަރައިގަތުމާއި ދޮގު މަޢުލޫމާތު ފެތުރުމަކީ އިންތިޚާބުތަކާ ބެހޭ އާންމު ޤާނޫނުގައި ކަނޑައެޅިފައިވާ ކުށެއް ކަމަށެވެ. އެގޮތުން ކެންޑިޑޭޓަކަށް އަމާޒުކޮށްގެން ކެންޑިޑޭޓުންގެ ކެމްޕެއިން ވަސީލަތްތަކަށް ގެއްލުން ދިނުމާއި، އޮންލައިންކޮށް ނުވަތަ އެނޫންވެސް ގޮތަކަށް ކެންޑިޑޭޓުންގެ އަބުރާ ބެހުމާއި ފުރައްސާރަކުރުމަކީ މަނާކަމެއް ކަމަށެވެ.
މީގެ އިތުރުން ކެންޑިޑޭޓަކަށް އަމާޒުކޮށް ހަޑި ހުތުރު ބަހުން ވާހަކަދެއްކުމާއި، ކެންޑިޑޭޓުންގެ ޒާތީ ދިރިއުޅުމާ ބެހޭ ގޮތުން ދެކެވޭ ޙަޤީޤަތެއް ނެތް ވާހަކަތަކަށް ހިތްވަރު ދިނުން ވެސް މީގެ ތެރޭގައި ހިމެނޭ ކަމަށް އީސީން ވަނީ ބުނެފައެވެ. ހަމައެހެންމެ، ކެންޑިޑޭޓަކަށް އެހެން މީހެއްގެ ފަރާތުން އެފަދަ ޢަމަލުތަކާ ކުރިމަތިލާން ޖެހިއްޖެ ނަމަ، ޤައުމީ އިލެކްޝަންސް ކޮމްޕްލެއިންޓްސް ބިއުރޯއަށް މައްސަލަ ހުށަހެޅޭނެ ކަމަށްވެސް އީސީން ވަނީ ބުނެފައެވެ.
އީސީން މިފަދައިން އިލްތިމާސްކޮށްފައި މިވަނީ އަންނަ އޭޕްރީލް މަހުގެ ހަތަރުވަނަ ދުވަހު އޮންނަ ލޯކަލް ކައުންސިލްތަކުގެ އިންތިޚާބު އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ފޯރި ގަދަވެ، ކެމްޕެއިން ހަރަކާތްތައް އިތުރުވެފައިވާ ދަނޑިވަޅެއްގައިކަން ފާހަގަކޮށްލަންޖެހެއެވެ.
އިސީން ވަނީ އިންތިޚާބާ ބެހޭ މަޢުލޫމާތުތައް ހޯދުމަށް އަދި އިންތިޚާބާ ބެހޭ މައްސަލަތައް ހުށަހެޅުމަށް 1414 އަށް ގުޅުމަށް އެދިފައެވެ.
