ލާމަރުކަޒީ ނިޒާމަކީ އެމްޑީޕީގެ އަމިއްލަ އުފެއްދުމެއް ނޫން ކަމަށާއި، އެ ނިޒާމު ފެށިގެން އައިސްފައިވަނީ ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމުގެ ވެރިކަމުގައި ކަމަށް މަޝްހޫރު ވިޔަފާރިވެރިޔާ އަދި ރައްޔިތުންގެ މަޖިލީހުގެ އޭދަފުށި ދާއިރާގެ މެންބަރު އަޙްމަދު ސަލީމް ވިދާޅުވެއްޖެއެވެ.
މެންބަރު ސަލީމް މި މޭރުމުން ވިދާޅުވެފައިވަނީ، ކޮންގްރެސް ޕާޓީގެ މައްޗަންގޮޅި އުތުރު ދާއިރާގެ ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުންނެވެ. މި ޖަލްސާގައި ވާހަކަދައްކަވަމުން ސަލީމް ވިދާޅުވީ، ލާމަރުކަޒީ ނިޒާމާ ގުޅޭގޮތުން އިދިކޮޅު އެމްޑީޕީން ފަތުރަމުންދަނީ އެއްވެސް އަސާސެއްނެތް ދޮގު ވާހަކަތަކެއް ކަމަށެވެ. އެގޮތުން، އެއީ އެމްޑީޕީގެ ”ދަރިއެއް“ ކަމަށް ބުނެ އިދިކޮޅުން ދައްކަމުން އަންނަ ވާހަކަތަކަށް އޭނާ ވަނީ ވަރުގަދަ ރައްދެއް ދެއްވައިފައެވެ.
”އެމްޑީޕީ މީހުން ވަރަށް ފަސޭހައިން ބުނަމުން އަންނަ ވާހަކައެއް މީ ތިމަންނަމެންގެ ނިޒާމެކޭ، ތިމަންނަމެންގެ ދަރިއެކޭ. މީ އެއްގޮތަކަށްވެސް އެހެން އައިކަމެއް ނޫން. މިކަމަކީ ރައީސް މައުމޫނުގެ ދުވަސްވަރުގަ ޙަޤީޤަތުގަ މިކަން ފެށިގެން އައީ،“ މެންބަރު ސަލީމް ވިދާޅުވިއެވެ.
މެންބަރު ސަލީމް ފާހަގަކުރެއްވި ގޮތުގައި، ލާމަރުކަޒީ ނިޒާމު ރާއްޖެއަށް ގެނައުމުގެ މަސައްކަތްތައް އެންމެ ފުރަތަމަ ފެއްޓެވި ބޭފުޅަކީ ޢަބްދުﷲ ޙަމީދުއެވެ. އޭގެ ފަހުން އިލްޔާސް އިބްރާހީމާއި، ކުރީގެ ނައިބު ރައީސް މުޙައްމަދު ވަޙީދުއްދީން ވެސް މިކަމުގައި އިސްކޮށް އުޅުއްވި ކަމަށާއި، ވަކިން ޚާއްޞަކޮށް ކުރީގެ ނައިބު ރައީސް ވަޙީދުއްދީން ރާއްޖޭގެ ހުރިހާ ރަށަކަށް ޒިޔާރަތްކުރައްވައި، މި ނިޒާމު އިތުރަށް ހަރުދަނާކުރެއްވުމަށް ބުރަ މަސައްކަތްތަކެއް ކުރައްވާފައިވާކަން އޭނާ ވަނީ ފާހަގަކުރައްވައިފައެވެ.
”ލާމަރުކަޒީ“ މި ލަފުޒަކީ މީގެ ކުރިން ދިވެހިންނަށް އިވިފައިވާ އަދި ދިވެހިން ދަންނަ ލަފުޒެއް ނޫންކަން ފާހަގަކުރައްވަމުން މެންބަރު ސަލީމް ވިދާޅުވީ، މި ލަފުޒު އެންމެ ފުރުތަމަވެސް ދިވެހިންނަށް އިވިގެން ގޮސްފައިވަނީ ރައީސް މައުމޫންގެ ދޫފުޅުން ކަމަށެވެ.
އެމްޑީޕީއަކީ އެއްވެސް އިރެއްގައި ލާމަރުކަޒީ ނިޒާމު ޤަބޫލުކުރި ޕާޓީއެއް ނޫން ކަމަށާއި، ކަންމިހެން އޮތްއިރު އެ ނިޒާމަކީ އެމްޑީޕީގެ އުފެއްދުމަކަށް ވާނެ އެއްވެސް ސަބަބެއް ނޯންނާނެ ކަމަށްވެސް މެންބަރު ސަލީމް ވަނީ ވިދާޅުވެފައެވެ. ނަމަވެސް އެ ނިޒާމަކީ މިހާރު ވެރިކަންކުރާ ޕާޓީ ޕީއެންސީގެ ނިޒާމެއް ކަމަށާއި، ކުރިއަށް އޮތް ތަނުގައިވެސް ލާމަރުކަޒީ ނިޒާމު ފުރިހަމަކޮށްދޭނީ އެ ޕާޓީން ކަމުގައި މެންބަރު ސަލީމް ވަނީ އިތުރަށް ވިދާޅުވެފައެވެ.
