މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ އައު ޑެޕިއުޓީ ސީއީއޯއަކަށް އިބްރާހިމް ޒިޔަތު ޢައްޔަންކޮށްފިއެވެ.
އެމްޕީއެލްއިން ވަނީ އެ ކުންފުނީގެ ޑެޕިއުޓީ ސީއީއޯގެ މަޤާމަށް އިބްރާހިމް ޒިޔަތު ޢައްޔަންކޮށްފައިވާކަން ހާމަކޮށް އޭނާއަށް ހޫނު މަރުޙަބާއެއް ކިޔައިފައެވެ. އެމްޕީއެލްގެ ޑެޕިއުޓީ ސީއީއޯގެ މަޤާމުގެ އިތުރުން އެ ކުންފުނީގެ ބޯޑަށް ވެސް ޒިޔަތު ވަނީ ޢައްޔަންކޮށްފައެވެ.
އެމްޕީއެލްގެ ޑެޕިއުޓީ ސީއީއޯއަކަށް ޒިޔަތު ޢައްޔަންކުރެވުމާއެކު އެ ކުންފުނީގައި މި ވަގުތު އޭނާއާއެކު ތިން ޑެޕިއުޓީ ސީއީއޯއިން ތިބޭނެއެވެ.
ފާހަގަކޮށްލެވޭ ގޮތުގައި ޒިޔަތަކީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯގެ މަޤާމު ފުރުއްވާފައިވާ ބޭފުޅެކެވެ. މީގެ އިތުރުންވެސް ސަރުކާރުގެ އެކި ކުންފުނިތަކުގެ މުހިއްމު މަޤާމުތަކެއް އޭނާ ފުރުއްވާފައިވެއެވެ.
މީގެ އިތުރުން ޒިޔަތަކީ ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ފުރިހަމަ ކުރައްވާފައިވާ ބޭފުޅެކެވެ.
