ހއ. އުލިގަމުގައި ޒަމާނީ ފެންވަރަކަށް ޔޮޓް މެރީނާއެއް ތަރައްޤީކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ސާސީ ކޮންސްޓްރަކްޝަން ޕްރައިވެޓް ލިމިޓެޑްއާއި ޙަވާލުކޮށް، މަސައްކަތުގެ އެއްބަސްވުމުގައި އިއްޔެ ސޮއިކޮށްފިއެވެ.
އުލިގަމުގައި ޒަމާނީ ފެންވަރަކަށް ޒޮޓް މެރީނާއެއް ތަރައްޤީކުރުމުގެ އެއްބަސްވުމުގައި ސޮއިކުރުމަށް އިއްޔެ އެމްޕީއެލްގެ މައި އިދާރާގައި ވަނީ ރަސްމިއްޔާތެއް ބާއްވައިފައެވެ. މި ރަސްމިއްޔާތުގައި މި މަސައްކަތުގެ އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ ޗީފް އެގްޒެކެޓިވް އޮފިސަރު ޢަލީ ހާޝިމްއެވެ. ސާސީ ކޮންސްޓްރަކްޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޢަބްދުﷲ ސަވާދެވެ.
މި މަޝްރޫއަކީ އެކި ފިޔަވަހިތަކަކަށް ބަހާލައިގެން ކުރިއަށްގެންދިއުމަށް ހަމަޖެހިފައިވާ މަޝްރޫއެކެވެ. އެގޮތުން މި މަޝްރޫއުގެ ފުރަތަމަ ފިޔަވަހީގެ ދަށުން، އެއްފަހަރާ 18 ޔޮޓަށް ބަނދަރުކުރެވޭނެ ޖާގައިގެ ބަނދަރެއް ތަރައްޤީކުރުމަށް ވަނީ ހަމަޖެހިފައެވެ. މި ޔޮޓް މެރީނާ ތަރައްޤީކޮށް ނިންމާލެވުމުން ޔޮޓްފަހަރަށް ބޭނުންވާ ޚިދުމަތްތައް ދެވި، ކަސްޓަމްސްއާއި އިމިގްރޭޝަނުގެ ޚިދުމަތްތައް ވެސް ލިބިގެންދާނެއެވެ.
މި މަޝްރޫއާއި ގުޅިގެން އެމްޕީއެލްއިން އިތުރަށް ބުނެފައިވަނީ، މި ޔޮޓް މެރީނާ އޮޕަރޭޓްކޮށް އިތުރަށް ތަރައްޤީކުރާނެ ފަރާތެއް ހޯދުމުގެ މަސައްކަތް ވެސް އެ ކުންފުނިން މިހާރު ކުރަމުން އަންނަ ކަމަށެވެ.
ފާހަގަކޮށްލެވޭ ގޮތުގައި އުލިގަމަކީ ރާއްޖެއަށް އެތެރެވާ ޔޮޓުފަހަރު އެންމެ ގިނައިން ބަނދަރުކުރާ ސަރަޙައްދުތަކުގެ ތެރެއިން އެންމު މުހިންމު އެއް ސަރަޙައްދެވެ.
