މާލޭ އުތުރު ފަރާތު ބޮޑުތަކުރުފާނު މަގު ޒަމާނީ ފެންވަރަކަށް ތަރައްޤީކުރުމުގެ މަޝްރޫޢުގެ ދަށުން ރަސްމީ ފާލަމުން ފެށިގެން ހެންވޭރު ފެރީ ޓަރމިނަލާއި ހަމައަށް އެ މަގު ބަންދުކުރުމަށް ނިންމައިފިއެވެ.
މިކަމާ ގުޅިގެން މާލޭ ސިޓީ ކައުންސިލުން ކޮށްފައިވާ އިޢުލާނެއްގައި ބުނެފައިވަނީ، ބޮޑުތަކުުރުފާނު މަގު ޒަމާނީ ފެންވަރަކަށް ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް މި މަހުގެ 21 ވަނަ ދުވަހު ފެށުމަށް ހަމަޖެހިފައިވާ ކަމަށެވެ. އެ ސަރަޙައްދު ބަންދުކުރުމަށް ނިންމާފައިވަނީ ވަކިވަކި ސެގްމަންޓްތަކަކަށް ބަހާލައިގެންނެވެ.
ބޮޑުތަކުރުފާނު މަގު ޒަމާނީ ފެންވަރަކަށް ތަރައްޤީކުރުމަށް އެ ސަރަޙައްދު ބަންދުކުރުމަށް ހަމަޖެހިފައިވާ ގޮތަކީ:
- ހެންވޭރު ޓަރމިނަލުން ފެށިގެން، މަސްވެރިންގެ ޕާކާ ހަމައަށް ހިމެނޭ ސަރަޙައްދު: 21 މާރިޗުން ފެށިގެން މަސައްކަތް ނިންމައި ސަރަޙައްދު ހުޅުވެންދެން.
- މަސްވެރިންގެ ޕާކުން ފެށިގެން ފަސް ނަންބަރު ފާލަމާ ހަމައަށް ހިމެނޭ ސަރަޙައްދު: 30 މާރިޗުން ފެށިގެން މަސައްކަތް ނިންމައި ސަރަޙައްދު ހުޅުވެންދެން.
- ފަސް ނަންބަރު ފާލަމުން ފެށިގެން ޢިއްޒުއްދީން ފާލަމާ ހަމައަށް ހިމެނޭ ސަރަޙައްދު: 17 އޭޕްރީލުން ފެށިގެން މަސައްކަތް ނިންމައި ސަރަޙައްދު ހުޅުވެންދެން.
މާލޭ ސިޓީ ކައުންސިލުން ބުނެފައިވަނީ، މިއަދުން ފެށިގެން ބޮޑުތަކުރުފާނު މަގު ޒަމާނީ ފެންވަރަކަށް ތަރައްޤީކޮށް އާންމުކޮށް އެ މަގު ހުޅުވާލެވެންދެން، އެ ސަރަޙައްދުގެ ފަޅުގެ ސަރަޙައްދުގައި އެއްވެސް އުޅަނދެއް މަޑުކޮށްގެން އޮތުމާއި، ދާއިމީކޮށް އެއްވެސް އުޅަނދެއް އަޅާފައި ބޭއްވުމަކީ މަނާ ކަމެއް ކަމަށެވެ. ފަޅުގެ ސަރަޙައްދު ބަންދުކުރާއިރު، އެ ސަރަޙައްދުގައި ބަނދަރުކޮށްފައި ހުންނަ އުޅަނދުތަކަށް ވަކި ޚާއްޞަ އިންތިޒާމެއް ހަމަޖައްސާފައިވާ ކަމެއް ސިޓީ ކައުންސިލުން އަދި ހާމަކޮށްފައެއް ނުވެއެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރަން މި ސަރުކާރުން ޙަވާލުކޮށްފައިވަނީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އަށެވެ. އެ ކުންފުންޏަށް މި މަސައްކަތް ކުރުމަށް ޙަވާލުކޮށްފައިވަނީ 144.5 މިލިއަން ރުފިޔާއަށް 455 ދުވަހުގެ ތެރޭގައި މަސައްކަތް ނިންމާ ގޮތަށެވެ.
