މި އަހަރުގެ ފިޠުރު ޢީދު ނަމާދު މާލެ ސަރަޙައްދުގެ ހަތަރު ސަރަޙައްދެއްގައި ބޮޑު ޖަމާޢަތުގައި ކުރާގޮތަށް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން މިއަދު އާންމުކޮށްފައިވާ ލިސްޓެއްގައިވާ ގޮތުން، ބޮޑު ޖަމާޢަތުގައި ޢީދު ނަމާދު ކުރުމަށް ހަތަރު ސަރަޙައްދެއް ވަނީ ހަމަޖެހިފައެވެ. އެ ސަރަޙައްދުތަކަކީ:
- މާފަންނު ސްޓޭޑިއަމް
- ވިލިމާލެ ފުޓްބޯޅަ ދަނޑު
- ހުޅުމާލެ ސިންތެޓިކް ޓްރެކް (ފުރުތަމަ ފިޔަވަހި)
- ހުޅުމާލެ މަސްޖިދް އާދަމް ހިމެނޭ ހުސްބިން (ދެވަނަ ފިޔަވަހި)
މީގެ އިތުރުން، މާލެ ސަރަޙައްދުގެ 24 މިސްކިތެއްގައި ޢީދު ނަމާދު ކުރުން ކުރިއަށްދާނެ ކަމަށް އިސްލާމިކް މިނިސްޓްރީން ވަނީ މަޢުލޫމާތު ދީފައެވެ. މާލެ ސަރަޙައްދުގައި ޢީދު ނަމާދު ކުރަން ފަށާނީ ހެނދުނު 07:00 ގައެވެ.
ކޮންމެ އަހަރެއްގެ ވެސް ފިޠުރު ޢީދާއި އަޟްޙާ ޢީދު ދުވަހު ބޮޑު ޖަމާޢަތުގައި ޢީދު ނަމާދު ކުރުމަކީ ރާއްޖޭގައި އަބަދުވެސް ކުރަމުން އަންނަ ކަމެކެވެ. ކަލަންޑަރުގައިވާ ގޮތުން މި އަހަރުގެ ފިޠުރު ޢީދު ދުވަހަކީ މި ހަފްތާގެ ހުކުރު ދުވަހެވެ.
