ތުރުކީ ވިލާތާއި އިންޑިއާގެ ތިން އުޅަނދެއް ހުރުމުޒް ކަނޑުއޮޅިން ދަތުރުކުރުމުގެ ހުއްދަ އީރާނުން ދީފިއެވެ.
އީރާނުން ހުރުމުޒް ކަނޑުއޮޅި ބަންދުކޮށް އެ ސަރަޙައްދުން އެއްވެސް އުޅަނދަކަށް ދަތުރުނުކުރެވޭ ގޮތަށް ބަންދުކޮށްފައިވަނީ ހުސްވި ފެބްރުއަރީ މަހުގެ 28 ވަނަ ދުވަހު އިޒުރޭލާއި އެމެރިކާ ގުޅިގެން އީރާނަށް ދިން ނިރުބަވެރި ޙަމަލާތަކާއި ގުޅިގެންނެވެ. މި ޙަމަލާތަކުގެ ރައްދެއްގެ ގޮތުން އީރާނުން ވަނީ އިޒުރޭލަށާއި، މެދުއިރުމަތީގައި ހުންނަ އެމެރިކާގެ އަސްކަރީ މަޒުކަޒުތަކަށާއި މުދަލަށް އަމާޒުކޮށް ވަރުގަދަ ޙަމަލާތައް ދީފައެވެ.
ތެލާއި ގޭސް އުފުލުމަށް ބޭނުންކުރާ މައި މަގެއް ކަމަށްވާ ހުރުމުޒް ކަނޑުއޮޅި އީރާނުން ބަންދުކުރުމާއި ގުޅިގެން އެ ސަރަޙައްދުގައި އެތައް ސަތޭކަ އުޅަނދެއް ތާށިވެ، މިއިން ޒަމާނަކު ނުއުފުލޭ ވަރަށް ތެލުގެ އަގުތައް ވަނީ އުފުލިގެން ގޮސްފައެވެ. އަދި ކުރިއަށް އޮތް ތަނުގައި ތެލުގެ އަގުތައް މިއަށްވުރެ ބޮޑަށް އުފުލިގެންދާނެ ކަމަށް ކަމާ ބެހޭ މާހިރުން ވަނީ ލަފާކޮށްފައެވެ.
ހުރުމުޒް ކަނޑުއޮޅި ބަންދުކުރުމާއި ގުޅިގެން ތުރުކީވިލާތުގެ 15 އުޅަނދެއް ހުރުމުޒް ކަނޑުއޮޅީގައި ވަނީ ތާށިވެފައެވެ. މިކަން ހާމަކުރެއްވީ އެ ޤައުމުގެ ޓްރާންސްޕޯރޓް މިނިސްޓަރު ޢަބްދުލްކާދިރު އުރަަލޮގްލުއެވެ. ނަމަވެސް ޚާއްޞަ ހުއްދައެއްގެ ދަށުން އޭގެތެރެއިން އެއް އުޅަނދަށް ރައްކާތެރިކަމާއެކު އެ ކަނޑުއޮޅި ހުރަސްކުރެވިފައިވާ ކަމަށް އޭނާ ވިދާޅުވިއެވެ.
މީގެ އިތުރުން އިންޑިއާގެ ދެ އުޅަނދެއް ވެސް ހުރުމުޒް ކަނޑުއޮޅިން ދަތުރުކުރުމުގެ ހުއްދަ އީރާނުން ވަނީ ދީފައެވެ. އެގޮތުން އިންޑިއާގެ ’ޝިވާލިކް‘ އަދި ’ނަންދާ ދޭވީ‘ ނަމަކަށް ކިޔާ ދެ އުޅަނދަކަށް ހުރްމުޒް ކަނޑުއޮޅި ހުރަސްކުރުމުގެ ހުއްދަ އީރާނުން ދީފައިވާ ކަމަށާއި މިދެ އުޅަނދު އެ ސަރަޙައްދުން ދަތުރުކުރުމުގެ ހުއްދަ ދީފައިވަނީ ވަނީ، ޚާއްޞަ އިސްތިސްނާއެއްގެ ދަށުން ކަމަށްވެއެވެ. ’ޝިވާލިކް‘ ނަމަކަށް ކިޔާ އުޅަނދު ހުރްމުޒް ކަނޑުއޮޅި ހުރަސްކޮށްފައި ވަނީ އިންޑިޔާގެ ކަނޑުގެ ސިފައިންގެ މަނަވަރެއްގެ ޙިމާޔަތުގައެވެ. އަދި، ކުރިއަށް އޮތް މަދު ގަޑިއިރުތަކެއްގެ ތެެރޭގައި ’ނަންދާ ދޭވީ‘ ނަމަކަށް ކިޔާ އުޅަނދު އެ ކަނޑުއޮޅި ހުރަސްކުރާނެ ކަމަށް ބެލެވެއެވެ.
ހުރުމުޒް ކަނޑުއޮޅިއަކީ ދުނިޔެއަށް ބޭނުންވާ ތެލުގެ 20 އިންސައްތަ އުފުލާ މަގެވެ. ހަނގުރާމައިގެ މި ޙާލަތުގައި އެ ކަނޑުއޮޅި ހުރަސްކުރުމަށް މަސައްކަތްކުރާ އުޅަނދުފަހަރަށް އީރާނުން އަންނަނީ ޙަމަލާ ދެމުންނެވެ. އެހެންކަމުން ހަނގުރާމައިގެ މި ޙާލަތުގައި ހުރުމުޒް ކަނޑުއޮޅިން ދަތުރުކުރެވޭނީ އީރާނުން ހުއްދަދޭ ވަކި ޚާއްޞާ އުޅަނދުތަކަށް އެކަންޏެވެ.
