މެދުއިރުމަތީގައި މިހާރު ހިނގަމުންދާ ހަނގުރާމައާއި ގުޅިގެން ފްލައިޓްތައް ކެންސަލްކުރުމުގެ ސަބަބުން ރާއްޖެއިން، ފުރޭނެ ގޮތެއް ނެތިފައި ތިބި 1,680 ފަތުރުވެރިއަކަށް ސަރުކާރުން އެކި ގޮތްގޮތުން އެހީތެރިކަން ފޯރުކޮށްދީފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިކަމާ ގުޅޭ ތަފްޞީލު ހާމަކުރައްވަމުން ޓޫރިޒަމް މިނިސްޓަރު ޠާރިޤް އިބްރާހިމް ވިދާޅުވީ، ހަނގުރާމަ ފެށުނު ދުވަހުން ފެށިގެން ސަރުކާރުން އެންމެ ބޮޑު އިސްކަމެއްދީގެން ކޮށްފައިވާ މަސައްކަތަކީ ހަނގުރާމައިގެ ސަބަބުން ފުރޭނެ ގޮތެއް ނެތިފައި ތިބި ފަތުރުވެރިންނަށް ބޭނުންވާ ވަސީލަތްތައް ފޯރުކޮށްދިނުން ކަމަށެވެ.
އެގޮތުން، ފަތުރުވެރިންނަށް ބޭނުންވާ މަޢުލޫމާތު ފޯރުކޮށްދިނުމަށް ވެލާނާ އިންޓަރނޭޝަނަލް އެއަރޕޯޓުގައި ވަކިން ޚާއްޞަ ޑެސްކެއް ޤާއިމުކުރެވިފައިވާކަން ފާހަގަކުރައްވަމުން މިނިސްޓަރު ވިދާޅުވީ، މި މަސައްކަތުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ފަރާތުން ވަރަށް ބޮޑު އެހީތެރިކަން ލިބިފައިވާ ކަމަށެވެ.
މީގެ އިތުރުން ނުފުރި އެއަރޕޯޓުގައި މަޑުކުރަންޖެހުނު ފަތުރުވެރިން ތިބެލުމަށް ކުރީގެ ޑޮމެސްޓިކް ޓަރމިނަލް ހަމަޖައްސައިދެވުނު ކަމަށާއި، އެތަނުގައި އެއްފަހަރާ 150 މީހުންނަށް ކައިބޮއި ހަދާ ނިދޭނެ އިންތިޒާމު ހަމަޖައްސައިދެވުނު ކަމަށެވެ.
ރާއްޖެއަށް ޒިޔާރަތްކުރާ ފަތުރުވެރިންގެ 30 އިންސައްތަ ފަތުރުވެރިންނަކީ މެދުއިރުމަތިން ޒިޔާރަތްކުރާ ފަތުރުވެރިންނެވެ. އެހެންކަމުން ހަނގުރާމައިގެ މި ދަނޑިވަޅުގައި ދަތުރުފަތުރުގެ ދަތިތަކަށް ޙައްލު ހޯދުމަށް ރަޝިއާ، ޗައިނާ އަދި އިންޑިއާ ފަދަ ޤައުމުތަކުން އިތުރު ފްލައިޓުތައް ގެނައުމަށް ސަރުކާރުން ދަނީ މަސައްކަތް ކުރަމުންނެވެ.
މީގެ އިތުރުން އެމްބަސީތަކާ ގުޅިގެން ރާއްޖެ އިތުރަށް މާކެޓް ކުރުމުގެ މަސައްކަތް ވެސް ސަރުކާރުން އަންނަނީ ކުރަމުންނެވެ.
