މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ އުޞޫލުގެ ދަށުން، ޚާއްޞަ އެހީއަށް ބޭނުންވާ ފަރާތްތަކަށް ޚާއްޞަކޮށްފައިވާ ކެޓަގަރީގެ ޝަރުޠުތައް އިޞްލާޙު ކުރުމަށްފަހު، ފްލެޓަށް އެދި ހުށަހެޅުމުގެ ފުރުޞަތު ހުޅުވާލުމަށް ތައްޔާރުވެއްޖެއެވެ.
މިކަމާ ގުޅިގެން ކޮންސްޓްރަކްޝަން މިނިސްޓްރީން ބުނެފައިވަނީ، ސަރުކާރުގެ ”ބޯހިޔާވަހިކަން އެންމެންނަށް“ ސިޔާސަތުގެ ”އާޢިލީ ބޯހިޔާވަހިކަން“ ޕުރޮގުރާމުގެ ތެރެއިން، 28 ޑިސެންބަރު 2025 ވަނަ ދުވަހު، ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުޞޫލުގެ ދަށުން ބޯހިޔާވަހިކަން ފޯރުކޮށްދިނުމުގައި ޚާއްޞަ އިސްކަންދޭ ”ނުކުޅެދުންތެރިކަން ހުންނަ ފަރާތްތަކުގެ ކެޓަގަރީ“ އަށް ވަކިން އެޕްލިކޭޝަން ހުށަހެޅޭގޮތަށް ހަދައި، އެ ކެޓަގަރީގެ ޝަރުޠުތަކާއި، އެ ކެޓަގަރީއަށް އެޕްލިކޭޝަން ހުށަހަޅާނެ ގޮތާއި، ޕޮއިންޓު ދިނުމުގެ އުޞޫލާއި، ހައުސިންގ ޔުނިޓު ކަނޑައަޅާ ގޮތްތައް ހިމަނައި، އެ އުޞޫލުގެ ދަށުން ފުލެޓަށް އެދި ފޯމު ހުށަހެޅުމަށް ހުޅުވާލަން ނިންމާފައިވާ ކަމަށެވެ.
މި އުޞޫލުގެ ދަށުން އެޕްލިކޭޝަން ހުށަހެޅުމަށް ހުޅުވާލުމަށް ހަމަޖެހިފައިވަނީ، މި މަހުގެ 24 ވަނަ ދުވަހުގެ ހެނދުނު 11:00 އިން ފެށިގެން އަންނަ އޭޕްރީލް މަހުގެ 30 ވާ ބުރާސްފަތި ދުވަހުގެ ރޭގަނޑު 23:59 އާއި ހަމައަށެވެ. މި އުޞޫލުގެ ދަށުން ބޯހިޔާވަހިކަމަށް އެދި އެޕްލިކޭޝަން ހުށަހަޅާނީ https://boahiyaavahikan.housing.gov.mv ޕޯޓަލް މެދުވެރިކޮށެވެ.
ކޮންސްޓްރަކްޝަން މިނިސްޓްރީން ވަނީ ފުލެޓަށް އެދި ފޯމު ހުށަހަޅާ ފަރާތްތަކުން ހުށަހަޅަންޖެހޭ ހުރިހާ ލިޔެކިޔުންތައް ހަމައަށް ހުރިތޯ ބަލައި، ފޯމާއެކު އެ ލިޔެކިޔުންތައް ހުށަހެޅުމަށް އެދިފައެވެ.
މިކަމާ ގުޅިގެން އެއްވެސް މަޢުލޫމާތެއް ސާފުކުރުމަށް ބޭނުންވާ ފަރާތެއް ހުރިނަމަ ކޮންސްޓްރަކްޝަން މިނިސްޓްރީގެ ހޮޓްލައިން ނަންބަރު 4004860, 4004861, 4004862, 4004863, 4004864 ނުވަތަ 4004865 ގުޅައި މަޢުލޫމާތު ސާފުކުރުމަށް އެ މިނިސްޓްރީން ވަނީ އެދިފައެވެ. މީގެ އިތުރުން އެ މިނިސްޓްރީގެ އީމެއިލް: hotline@infrastructure.gov.mv އަށް މެއިލްކޮށްގެންވެސް މިކަމާ ގުޅޭގޮތުން މަޢުލޫމާތު ސާފުކުރެވޭނެ ކަމަށް އެ މިނިސްޓްރީން ވަނީ ބުނެފައެވެ.
