ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި ތާއީދު ކުރައްވާނީ ކޮންގްރެސް ޕާޓީގެ ފަރާތުން ވާދަކުރާ ކެންޑިޑޭޓުންނަށް އެކަނިކަމަށް އެ ޕާޓީގެ ރައީސް އަދި ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ. މުޢިއްޒު މި މޭރުމުން ވިދާޅުވީ، ކޮންގްރެސް ޕާޓީގެ ފަރާތުން މިއަދު ހުޅުމާލޭ ދެކުނު ދާއިރާގައި ކުރިއަށްގެންދިޔަ ދޮރުން ދޮރަށް ހަރަކާތަށް ނުކުމެ ވަޑައިގެން މީޑިއާތަކަށް ދެއްވި އިންޓަވިއުއެއްގައެވެ. އެމަނިކުފާނު އެކަން ޢާންމުންނަށް އިޢުލާން ކުރައްވާފައި މިވަނީ، ހުޅުމާލެ ދެކުނު ދާއިރާއަށް އެމްޑީޕީގެ ޓިކެޓުގައި ކައުންސިލަށް ވާދަކުރާ ކެންޑިޑޭޓު ޣާލިބް ދައްކަމުން އަންނަ ވާހަކަތައް ދޮގުކުރެއްވުމުގެ ގޮތުންނެވެ.
އެމްޑީޕީގެ ޓިކެޓްގައި ކައުންސިލަށް ވާދަކުރާ ކެންޑިޑޭޓު ޣާލިބް ވަނީ، ރައީސް ޑރ. މުޢިއްޒު އޭނާއަށް ތާއީދުކުރައްވާ ކަމަށް ބުނެ އެއްވެސް ޙަޤީޤަތެއް ނެތް ދޮގު ވާހަކަތަކެއް ފަތުރައިފައެވެ. ޣާލިބުގެ މި ވާހަކަތަކަށް ރައްދުދެއްވަމުން ރައީސް ވިދާޅުވީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި އެމަނިކުފާނު ތާއީދުކުރައްވާ ކެންޑިޑޭޓުން ތިބޭނީ ޕީއެންސީ ޓިކެޓުގައި އެކަނި ކަމަށެވެ.
”މި ދާއިރާގައި އަޅުގަނޑަށް ޚަބަރުތަކެއް ލިބިފައިވޭ އެމްޑީޕީން ވާދަކުރާ ކެންޑިޑޭޓު ބުނާ ކަމަށް އަޅުގަނޑުގެ ތާއީދު އޮތީ އެ ބޭފުޅާއަށް ކަމަށް، އެއީ ކަނޑައެޅިގެން ބޮޑު ދޮގެއް، އަޅުގަނޑަކީ ޕާޓީ ނިޒާމު ޤަބޫލުކުރާ މީހެއް، އަޅުގަނޑު ބޭނުންވަނީ އަޅުގަނޑުމެންގެ ޕާޓީ ޕީއެންސީއަށް ކުރިއެރުން ނޫނިއްޔާ އަޅުގަނޑުމެންގެ ކެންޑިޑޭޓުން ހޮވަން، ދޫންޏަށް ވޯޓުދޭން ބޭނުންވަނީ އިނގޭތޯ،“ – ރައީސް ޑރ. މުޢިއްޒު ވިދާޅުވިއެވެ.
މިކަން ދެވަނަ ފަހަރަށް ތަކުރާރުކުރައްވަމުން ވެސް ރައީސް ވިދާޅުވީ، އެމަނިކުފާނުގެ ތާއީދު އޮންނާނީ ޕީއެންސީގެ ފަރާތުން ވާދަކުރާ ކެންޑިޑޭޓުންނަށް އެކަނި ކަމަށާއި، އެއްވެސް ޕާޓީއެއްގެ ޓިކެޓުގައި ވާދަކުރާ ކެންޑިޑޭޓުންނަށާއި، މިނިވަން ކެންޑިޑޭޓުންނަށް ވެސް އެމަނިކުފާނު ތާއީދު ނުކުރައްވާނެ ކަމަށެވެ.
ފާހަގަކޮށްލެވޭ ގޮތުގައި ރައީސް ޑރ. މުޢިއްޒު މީގެކުރިންވެސް މި ވާހަކަ އެކި ތަންތަނުގައި ވިދާޅުވެފައިވެއެވެ.
