މަސްތުވާތަކެތީގެ މައްސަލައެއްގައި ތ. އަތޮޅުން ދެ މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ފުލުހުން ބުނީ، މި ދެ މައްސަލައިގައި ހައްޔަރުކޮށްފައިވަނީ ޢަބްދުﷲ ރަޝީދު، ޗަންޕާމާގެ / ތ. ކިނބިދޫ (41އ) އާއި މުޙައްމަދު މުނީރު، ބީޗުވިލާ / ތ. ބުރުނި (30އ) ކަމަށެވެ.
ފުލުހުން ބުނި ގޮތުގައި، މި ދެމީހުންގެ ތެރެއިން ޢަބްދުﷲ ރަޝީދު (41އ) ހައްޔަރުކޮށްފައިވަނީ ތ. ކިނބިދޫއިންނެވެ. އެގޮތުން މި މަހުގެ ނުވަވަނަ ދުވަހު ކިނބިދޫ މަގުމަތިން އޭނާ ހުއްޓުވައި ބަލައިފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއްހުރި ކަރުދާސްކޮޅެއް އޭނާގެ އަތުން ފެނިފައިވާކަމަށް ފުލުހުން ވަނީ ބުނެފައެވެ.
މި މައްސަލައިގައި ދެވަނައަށް ހައްޔަރުކުރެވުނު މުޙައްމަދު މުނީރު (30އ) ހައްޔަރުކޮށްފައިވަނީ ބުރުނީ ބަނދަރު ސަރަޙައްދުން ކަމަށް ފުލުހުން މަޢުލޫމާތުދެއެވެ. އެގޮތުން މި މަހުގެ ނުވަވަނަ ދުވަހު އޭނާއާމެދު ތުހުމަތުކުރެވިގެން ހުއްޓުވައި ބަލައިފާސްކުރިއިރު، އޭނާގެ އަތުންވެސް މަސްތުވާތަކެތި ކަމަށް ބެލެވޭ އެއްޗެއްހުރި ހަ ސެލޯފިންކޮޅު ފެނިފައިވާ ކަމަށް ފުލުހުން ވަނީ ބުނެފައެވެ.
މި މައްސަލައާ ގުޅިގެން އެ ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ ޢަބްދުﷲ ރަޝީދު 10 ދުވަހަށް އަދި މުޙައްމަދު މުނީރު ހަތް ދުވަހަށް ބަންދުކުރުމަށް އަމުރުކޮށްފައެވެ.
މި ދެ މައްސަލަ ވެސް ތަހުގީގުކުރަމުން އަންނަ ކަމަށް ފުލުހުން ވަނީ ބުނެފައެވެ.
