ރާއްޖެއަށް ފަތުރުވެރިން އައުން މަދުކުރުމަށް އިދިކޮޅު ފަރާތްތަކުން މަސައްކަތް ކުރަމުން އަންނަކަމަށް ފޮރިންގ މިނިސްޓަރު ޢަބްދުﷲ ޚަލީލް ވިދާޅުވެއްޖެއެވެ.
މިނިސޓަރު ޚަލީލް މި މޭރުމުން ވިދާޅުވީ، ކޮންގްރެސް ޕާޓީގެ ހުޅުމާލެ މެދު ދާއިރާގެ ޖަގަހަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުންނެވެ. މިނިސްޓަރު ވިދާޅުވީ އިދިކޮޅު ފަރާތްތަކުން ރާއްޖެއަށް ފަތުރުވެރިން ނުފޮނުވަން ޤައުުމުތަކުގައި އެދެމުން އަންނަކަމަށް ފާހަގަކުރެވިފައިވާ ކަމަށާއި، އެ ފަރާތްތަކުން އަންނަނީ ރާއްޖެ ބަދުނާމު ކުރުމަށްވެސް ބޭރުގެ އެކި ޤައުމުތަކަށާއި، އެކިއެކި ޖަމުޢިއްޔާތަކަށް ރާއްޖެއާ ގުޅޭގޮތުން ދޮގު މަޢުލޫމާތުދެމުން ކަމަށެވެ.
ބައެއް ފަރާތްތަކުން މިނިސްޓަރުގެ ސަމާލުކަމަށް މިކަން ގެނެސްފައިވާކަން ފާހަގަކުރައްވަމުން ޚަލީލް ވަނީ، ރާއްޖެ ބަދުނާމު ކުރުމަށް ބޭރުގެ އެކި ޤައުމުތަކުގައި އިދިކޮޅު ފަރާތްތަކުން ދައްކަމުންދާ ވާހަކަތައް ވަގުތުން ވަގުތަށް ހުއްޓާލުމަށް ގޮވާލައްވައިފައެވެ. އެފަދަ ވާހަކަތަކަކީ އެއްވެސް އަސާސެއް ނެތް ވާހަކަތަކެއްކަން ފާހަގަކުރައްވަމުން މިނިސްޓަރު ވިދާޅުވީ، އެކަމުގެ ސަބަބުން ރާއްޖެއަށްވެސް އެކި ގޮތްގޮތުން ގެއްލުންވާ ކަމަށެވެ.
”އަޅުގަނޑު ބައެއްފަހަރު ބައެއް ބޭފުޅުން ވިދާޅުވާ ވާހަކަ އަޑުއަހައިފަ ހިތަށްއަރާ، ހަމަ ދިވެހި ރައްޔިތުންގެ ތެރެއިން ބައެއްބާވައޭ ރާއްޖެ ބަދުނާމު ކުރުމަށްޓަކައި މިހާ ބޮޑެތި ދޮގުތައް ހަދައިގެން ބޭރުގެ އެކިއެކި ޖަމުޢިއްޔާތަކާ އެކިއެކި ޤައުމުތަކަށް މި ފޮނުވަނީ،“ – މިނިސްޓަރު ޚަލީލް ވިދާޅުވިއެވެ.
ނަމަވެސް ބޭރުގެ ޤައުމުތަކަށް ކަންކަމުގެ ތެދު ޙަޤީޤަތް ކިޔައިދިނުމުން އިދިކޮޅު ފަރާތްތަކުން ހަދަމުންދާ ދޮގުތައް ނަފީވަމުންދާ ކަމަށް މިނިސްޓަރު ޚަލީލް ވިދާޅުވިއެވެ.
މީގެ އިތުރުން ރާއްޖެއާއި ދިވެހި ރައްޔިތުންގެ ކުރިއެރުމަށް މަސައްކަތް ކުރުމަށް މިނިސްޓަރު ޚަލީލް ވަނީ އިދިކޮޅު ފަރާތްތަކަށް ގޮވާލައްވައިފައެވެ. އަދި ނިމިދިޔަ އެމްޑީޕީ ސަރުކާރުގައި ރައްޔިތުން ދަރުވާލި ފަދައިން، އިތުރަށް ދަރާފައިވާ ރައްޔިތުންތަކެއް މި ޤައުމުގައި އުޅުމަށް އެދިވަޑައިނުގަންނަވާ ކަމަށްވެސް މިނިސްޓަރު ވަނީ ވިދާޅުވެފައެވެ.
