މި އަހަރުގެ ރަމަޟާން މަހުގެ ޢުމްރާއަށް މީހުން ގެންދިއުމަށް ގިނަ ބައެއްގެ އަތުން ފައިސާ ނެގުމަށްފަހު، ވަގުތު ކުޑަތަންވެފައިވަނިކޮށް ދަތުރު ކެންސަލް ކުރުމުން، އަބްރާރު ޢުމްރާ ގުރޫޕުގެ މައްސަލަ ފުލުހުން ބަލަން ފަށައިފިއެވެ.
މި މައްސަލައާ ގުޅިގެން ފުލުހުން ބުނެފައިވަނީ، މި ރަމަޟާން މަހު ޢުމްރާއަށް މީހުން ގެންދިއުމަށްޓަކައި ގްރޫޕަކުން ފައިސާ ނެގުމަށްފަހު، ދަތުރު ކެންސަލްކޮށްފައިވާކަމުގެ ޝަކުވާ މި މަހުގެ ހަތަރުވަނަ ދުވަހު ފުލުހުންގެ ސަމާލުކަމަށް ގެނެސްފައިވާ ކަމަށެވެ. ފުލުހުންގެ ސަމާލުކަމަށް މި މައްސަލަ އައުމާއެކު، އެ މައްސަލައާ ގުޅިގެން ބަލަންޖެހޭ ކަންކަން މިހާރު ބަލަމުން އަންނަ ކަމަށްވެސް ފުލުހުން ވަނީ ބުނެފައެވެ.
ނަމަވެސް މި މައްސަލަ ފުލުހުންނަށް ހުށަހެޅީ އިސްލާމިކް މިނިސްޓްރީގެ ފަރާތުން ކަމެއް ނުވަތަ އަމިއްލަ ފަރާތަކުން ކަމެއް ފުލުހުން ހާމަކޮށްފައެއްނުވެއެވެ. ނަމަވެސް ވަގުތު ކުޑަތަންވެފައިވަނިކޮށް އަބްރާރް ޢުމްރާ ގުރޫޕުން ޢުމްރާ ދަތުރު ކެންސަލް ކުރި މައްސަލަ އިސްލާމިކް މިނިސްޓްރީން ވެސް އަންނަނީ ބަލަމުންނެވެ.
އަބްރާރް ޢުމްރާ ގުރޫޕްގެ މި ސްކޭމް ފަޅާއެރުމުން އެ ގުރޫޕުން ބުނެފައިވަނީ، ޢުމްރާ ދަތުރު ކެންސަލްކުރަން ޖެހުނު ސަބަބަކީ، މެދުއިރުމަތީގެ މަސްރަޙު ގޯސްވެފައިވާތީ، ސަޢޫދީއަށް ދިއުން ރައްކާތެރި ނޫންވީމާ ކަމަށެވެ. އެނގިފައިވާ ގޮތުގައި އެ ގުރޫޕުން ވިސާ އަދި ހޮޓެލް ބުކިންގގެ ކަންކަންވެސް ފުރިހަމަކޮށްފައި ނުވާކަން ޢުމްރާވެރިންނަށް ފަޅާއަރާފައިވަނީ ޢުމްރާގެ އަޅުކަމަށް ފުރަން އޮތް ވަގުތު ކުޑަތަންވެފައިވަނިކޮށެވެ.
މިކަމާ ގުޅިގެން ޢުމްރާއަށް މީހުން ގެންދިއުމަށް އަލްއަބްރާރު ޢުމްރާ ގުރޫޕަށް ދޫކޮށްފައިވާ ހުއްދަވެސް އިސްލާމިކް މިނިސްޓްރީން ވަނީ ވަގުތީގޮތުން ހިފަހައްޓައިފައެވެ.
އިސްލާމިކް މިނިސްޓްރީން އަންނަނީ ކަމާ ގުޅުންހުރި ފަރާތްތަކާއެކު، ޢުމްރާވެރިން ފުރުވާލުމުގެ މަސައްކަތް ކުރަމުންނެވެ.
