ދުނިޔޭގެ އެކި ސަރަޙައްދުތަކަށް ތެލާއި ގޭސް އުފުލުމަށް ބޭނުންކުރާ މައި މަގެއް ކަމަށްވާ ހުރުމުޒް ކަނޑުއޮޅި އީރާނުން ބަންދުކުރުމާ ގުޅިގެން ޢިރާޤުގެ ތެޔޮ އުފެއްދުމުގެ މަސައްކަތް ހުއްޓުމަކަށް އައިސްފިއެވެ.
ޔަހޫދީންނާއި އެމެރިކާ ގުޅިގެން ހުއްޓުމެއްނެތި އީރާނަށް ޙަމަލާ ދޭން ފެށުމާއެކު އީރާނުން ވަނީ އެއްވެސް އުޅަނދަކަށް ހުރުމުޒް ކަނޑުއޮޅި ބޭނުން ނުކުރެވޭނެ ކަމަށް އިޢުލާނުކޮށްފައެވެ.
އީރާނުން ވަނީ ހުރުމުޒްގެ ސަރަޙައްދުން ދަތުރުކުރާ އުޅަނދު ފަހަރަށް ޙަމަލާ ދޭނެ ކަމުގެ އިންޒާރުވެސް ދީފައެވެ. އެއާއެކު އެ ކަނޑުއޮޅި ހުރަސްނުކުރެވި، 200އަށްވުރެ ގިނަ ތެޔޮ ޓޭންކަރު ވަނީ އެ ސަރަޙައްދުގައި ތާށިވެފައެވެ. އުޅަނދުތައް ދަތުރުކުރުމަށް ހުރަސްއެޅި، ޓޭންކަރުތަކަށް އިތުރަށް ތެޔޮ ބަރާ ނުކުރެވޭތީ ގަލްފު ސަރަޙައްދުގެ ތެޔޮ އުފައްދާ މަރުކަޒުތަކުގެ ގުދަންތައް މިހާރު ވަނީ ފުރިފައެވެ. އެއާއެކު ތެޔޮ އުފެއްދުމުގެ މަސައްކަތް މި ވަގުތަށް މަޑުޖައްސައިލުމަށްވެސް އެ މަރުކަޒުތަކަށް ވަނީ މަޖުބޫރުވެފައެވެ.
މިހާރު އެ ކަނޑުއޮޅިން ކުރާ ދަތުރުތައް ހުއްޓިފައިވާއިރު، މި ހަނގުރާމަ އިތުރަށް ދިގުދެމިގެން ގޮސްފިނަމަ، ތެލުގެ އަގު އިތުރަށް މައްޗަށް ދާނެ ކަމަށް ދިރާސާ ކުރާ ފަރާތްތަކުން ބުނެއެވެ.
ހަނގުރާމައިގެ ކުރިން އީރާނުގެ ތެޔޮދަނޑުތަކުން ދިޔައީ ދުވާލެއްގެ މައްޗަށް ގާތްގަނޑަކަށް 4.3 މިލިޔަން ފީފާގެ ތެޔޮ ބަންދުކުރަމުންނެވެ. ނަމަވެސް ހުރުމުޒް ކަނޑުއޮޅި ބަންދުުކުރުމާ ގުޅިގެން ޢިރާޤުގެ މައި ތެޔޮދަނޑުތަކުގައި ތެޔޮ އުފައްދާ މިންވަރު މިހާރު ވަނީ 70 އިންސައްތަ ދަށަށް ގޮސްފައެވެ. އެ ޤައުމުގައި ދުވާލެއްގެ މައްޗަށް މިހާރު ބަންދުކުރަމުންދަނީ އެންމެ 1.3 މިލިޔަން ތެޔޮ ފީފާ ކަމަށް ރިޕޯޓުތައް ބުނެއެވެ.
މިއާއިއެކު ތެލުގެ އަގު ވަރަށް ބޮޑަށް މައްޗަށް އަރައި، ފީފާއެއްގެ އަގު 100 ޑޮލަަރަށް ވަނީ އުފުލިފައެވެ.
ސީއެންއެންގައި ރިޕޯޓްކޮށްފައިވާ ގޮތުގައި އިއްޔެ ބްރެންޓް ކްރޫޑް ފީފާއެއްގެ އަގު 14 އިންސައްތައަށް ވުރެ މައްޗަށް ގޮސް، އެމެރިކާގައި ވިޔަފާރިކުރާ ތެލުގެ އަގު ގާތްގަނޑަކަށް 12.63 އިންސައްތަ އިތުރުވެ 104 ޑޮލަރަށް ވަނީ އަރައިފައެވެ.
ރިޕޯޓް ބުނާ ގޮތުގައި މިއީ 2022 ވަނަ އަހަރު ރަޝިއާ ޔޫކްރޭން ހަނގުރާމައަށް ފަހު ތެލުގެ އަގު މިހާ މައްޗަށް އެރި ފަހަރެވެ. އަދި ހަނގުރާމަ ދެމިގެން ގޮސްފިނަމަ ތެލުގެ އަގު އިތުރަށް މައްޗަށް ދާން ފަށާނެ ކަމަށް ރިޕޯޓްކޮށްފައިވެއެވެ.
