ވެލާނާ އިންޓަނޭޝަނަލް އެއާޕޯޓުން ހަ ކިލޯއަށްވުރެ ގިނަ މަސްތުވާތަކެތި ރާއްޖެ އެތެރެކުރި ކަމުގެ ތުހުމަތުގައި ތިން މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ ދިވެއްސަކާއި އިންޑިއާގެ ދެ ރައްޔިތުންނެވެ. މި މައްސަލާގައި ހައްޔަރުކޮށްފައިވާ މީހުންނަކީ:
- ޢަލީ ޢިރުފާނު (28އ)، ގދ. ގައްދޫ / ހިތިލާގެ
- ދަނޫޝްކާނދަން ގޯޕާލް (19އ)، އިންޑިއާ
- ކަތިރިވިލް މަނިމަރަން (21އ)، އިންޑިއާ
މި ތިން މީހުންނަކީ މަސްތުވާތަކެތި ރާއްޖެ އެތެރެކުރި ކަމުގެ ތުހުމަތުގައި މޯލްޑިވްސް ކަސްޓަމްސް ސަރވިސްއިން ހިފަހައްޓައި ފުލުހުންނާ ހަވާލުކޮށްފައިވާ ތިން މީހުންނެވެ. މި މީހުން ހައްޔަރުކޮށްފައިވަނީ މަސްތުވާތަކެތި ރާއްޖެ އެތެރެކޮށް، އޭގެ ވިޔަފާރިކުރާ ކަމުގެ ތުހުމަތުގައި މި މާރިޗު މަހުގެ 3 ވަނަ ދުވަހުއެވެ.
މި މައްސަލާގައި ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ ޢަލީ ޢިރުފާނު ޝަރީއަތް ނިމެންދެން ބަންދުކުރުމަށް އަމުރުކޮށްފައެވެ. އަދި މި މައްސަލާގައި ހިމެނޭ އިންޑިއާގެ ދެ މީހުން ފަސް ދުވަހުގެ މުއްދަތަށް ބަންދުކުރުމަށް ކޯޓުން ވަނީ އަމުރުކޮށްފައެވެ.
ފުލުހުންގެ އިދާރާއިން މިހާރު ގެންދަނީ މި މައްސަލަ އިތުރަށް ތަހުގީގު ކުރަމުންނެވެ. މަސްތުވާތަކެތީގެ ވަގުފާރި ހުއްޓުވުމަކީ މި ސަރުކާރުން ބޮޑު އިސްކަމެއްދޭ ކަމަކަށްވާއިރު، މިފަދަ މައްސަލަތަކުގައި އަތުލައިގަނެވޭ މަސްތުވާތަކެތީގެ މިންވަރު އިތުރުވަމުންދާކަން ފާހަގަކުރެވެއެވެ.
