ނިއުރޯ ސާޖަރީތަކަށް ބޭނުންކުރާ ”އިންޓްރާ އޮޕަރޭޓިވް ނިއުރޯމޮނިޓަރިން“ ގެ ޚިދުމަތް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަދި ދަރުމަވަންތަ ހޮސްޕިޓަލުގައި ބޭނުންކުރަން ފަށައިފިއެވެ.
މިކަމާ ގުޅިގެން އައިޖީއެމް ހޮސްޕިޓަލުން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، އަލަށް ތަޢާރަފްކުރެވުނު ޓެކްނޮލޮޖީގެ އަލީގައި އޮޕަރޭޝަން ކުރަމުންދާ ވަގުތު ނާރުތަކަށް ލިބިދާނެ ގެއްލުންތައް ވަގުތުން ދެނެގަނެ، ސާޖަރީތަކުގައި ނާރުތަކަށް ލިބިދާނެ ގެއްލުންތައް ކުޑަކުރެވި، ބަލިމީހާގެ ރައްކާތެރިކަން އިތުރަށް ކަށަވަރުކުރެވިގެންދާނެ ކަމަށެވެ.
ނިއުރޯ ސާޖަރީތަކަށް ބޭނުންކުރާ "އިންޓްރާ އޮޕަރޭޓިވް ނިއުރޯމޮނިޓަރިން" ގެ ހިދުމަތް އައި.ޖީ.އެމް.އެޗް އަދި ދަރުމަވަންތަ ހޮސްޕިޓަލުން މިހާރު މިވަނީ ތައާރަފުކޮށްފައެވެ.
މި ޓެކްނޮލޮޖީގެ އަލީގައި އޮޕަރޭޝަން ކުރަމުންދާ ވަގުތު ނާރުތަކަށް ލިބިދާނެ ގެއްލުންތައް ވަގުތުން ދެނެގަނެ،… pic.twitter.com/A8ozqofLFK
— IGMH (@igmhmv) March 7, 2026
އަލަށް ފެށުނު މި ޚިދުމަތާ ގުޅިގެން އައިޖީއެމްއެޗްގެ ސީނިއަރ ކޮންސަލްޓަންޓް ސަބް ސްޕެޝަލިސްޓް އިން ނިއުރޯ ސާޖަރީ، ޑރ. ޢަލީ ނިޔާފް ވިދާޅުވީ، އިންޓްރާ އޮޕަރޭޓިވް ނިއުރޯ މޮނިޓަރިންއަކީ ބަލިމީހާގެ ރައްކަލަށްޓަކައި ކޮންމެހެން ހުރުން މުހިންމު ވަސީލަތެއް ކަމަށެވެ.
މި މެޝިން މަސައްކަތްކުރާ ގޮތަށް އަލިއަޅުއްވާލައްވަމުން ޑރ. ނިޔާފް ވިދާޅުވީ، އޮޕަރޭޝަން ކުރަމުންދާ ވަގުތުގައި ނާރުތައް މަސައްކަތްކުރާ ގޮތް މެޝިނުން ދައްކާނެ ކަމަށާއި، އޮޕަރޭޝަން ކުރަމުންދާ ވަގުތު ނާރަކާ ގާތްވެ ނާރަކަށް ގެއްލުން ލިބޭފަދަ ބަދަލެއް އަންނަނަމަ އެ މެޝިނުން އެލާމެއް އަޅާނެ ކަމަށާއި ނުވަަތަ ނާރަކަށް ގެއްލުމެއް ލިބި ތަފާތު ބަދަަލެއް އަންނަ ނަމަ ޕަސެންޓޭޖާއެކު ދައްކާނެ ކަމަށެވެ.
ޑރ. ނިޔާފް އިތުރަށް ވިދާޅުވީ ޢާންމުކޮށް ކުރާ އޮޕަރޭޝަންތައް އޭގެ ތެރޭގައި، ކަނދުރާގެ ޑިސްކް ސަރޖަރީ، މައިބަދައިގެ ޑިސްކް ސަރޖަރީ ނުވަތަ މައިބަދައަށް ގެއްލުން ލިބިގެން އަންނަ އޮޕަރޭޝަންތަކުގެ ތެރޭގައި، އިސްކުރު ޖަހާއިރު އިސްކުރުގެ އިންޓަގްރިޓީ ނުވަތަ އިސްކުރު ޖެހެމުންދާ ތަނާ އެކުގައި އިތުރު ނާރަކަށް ފިތޭ ނަމަވެސް މެޝިނުން އެކަން ފާހަގަކުރާނެ ކަމަށެވެ.
މި ޚިދުމަތާ ގުޅިގެން އައިޖީއެމް ހޮސްޕިޓަލުން ބުނެފައިވަނީ، މިއީ ބަލިމީހުންގެ ރައްކާތެރިކަން ކަށަވަރުކުރުމަށާއި، ފަރުވާގެ ފެންވަރު މަތިކުރުމަށް އެ ހޮސްޕިޓަލުން ކުރަމުންދާ މަސައްކަތުގެ ތެރެއިން ހޯދުނު މުހިންމު ކުރިއެރުމެއް ކަމަށެވެ.
