ސޫރިޔާއާ ގުޅޭ ސަރަޙައްދު ރޮނގު ހުރަސްކޮށް، ލުބްނާނަށް އެއްގަމުން ވަދެގަންނަން މަސައްކަތް ކުރި ޔަހޫދީންގެ ނިރުބަވެރި ފައުޖުތަކާ، ލުބްނާންގައި ޙަރަކާތްތެރިވާ ޙިޒްބުﷲގެ މުޖާހިދުން ކުރިމަތިލާން ފަށައިފިއެވެ.
ލުބްނާނުގެ ދައުލަތުގެ މީޑިޔާއިން ބުނީ، ސޫރިޔާ އާ ގުޅޭ ސަރަޙައްދީ ރޮނގު ކައިރީގައި ލުބްނާންގެ އިރުމަތީގެ ފަރުބަދަ މަތީ ސަރަޙައްދުގައި ވަރުގަދަ ކުރިމަތިލުންތައް ހިނގަމުންދާ ކަމަށެވެ.
ލުބްނާނުގެ ދެކުނަށް ޔަހޫދީ ފައުޖުން ވަންނަމުންދިޔަ ނަމަވެސް، މިއީ ފަހުގެ ތާރީޚެއްގައި ލުބްނާނުގެ އިރުމަތިން ޔަހޫދީން ވަދެގަންނަން މަސައްކަތް ކުރާ ފުރަތަމަ ފަހަރެވެ.
ލުބްނާނުގެ ސިއްޙީ ވުޒާރާއިން ބުނި ގޮތުގައި، އެއްގަމުން ވަދެގަންނަން މަސައްކަތް ކުރުމުގެ ކުރިން، ޔަހޫދީންގެ ނިރުބަވެރި ފައުޖުން ވަނީ އެ ސަރަޙައްދަށް ވަރުގަދަ ވައިގެ ޙަމަލާތައް ދީފައެވެ. އެ ޙަމަލާތަކުގައި މިހާތަނަށް 16 މީހުން ޝަހީދުވެ، 35 މީހުން ޒަޚަމްވެފައިވާކަމަށް އެ ވުޒާރާއިން ބުންޏެވެ.
ޙިޒްބުﷲއިން ޔަހޫދީނަށް ޙަމަލާދޭން ފެށީ، ފެބްރުއަރީ 28ގައި އެމެރިކާ އާ ގުޅިގެން ޔަހޫދީން އީރާނަށް ޙަމަލާދީ، އެ ޤައުމުގެ ރޫޙީ ވެރިޔާ އާޔަތުالله ޚާމަނާއީ ޝަހީދުކޮށްލުމުގެ ބަދަލުހިފުމުގެ ގޮތުންނެވެ.
ޙިޒްބުﷲ އާ ދެކޮޅަށް ކަމަށް ބުނެ، ޔަހޫދީން ދަނީ ލުބްނާންގެ ވެރިރަށް ބެއިރޫތާއި ވަށައިގެންވާ ސަރަޙައްދުތަކަށް ނިރުބަވެރި ޙަމަލާތައް ދެމުންނެވެ.
ޔަހޫދީންގެ ނިރުބަވެރި ޙަމަލާތަކުގައި މިހާތަނަށް ޖުމްލަ 217 މީހުން ޝަހީދުވެ، 798 މީހުން ވަނީ ޒަޚަމްވެފައެވެ. ޔަހޫދީންގެ ޙަމަލާތަކުގައި ގެދޮރު ގެއްލުނު މީހުންގެ ޢަދަދު ވެސް 100،000އާ ވަނީ ގާތްވެފައެވެ.
ޔަހޫދީންގެ ޢުދުވާނުތަކުގެ ރައްދުގައި، ޙިޒްބުﷲއިން ވަނީ ޔަހޫދީ ދައުލަތުގެ އުތުރުގައި ހުންނަ ކަނޑުގެ ސިފައިންގެ މަރުކަޒަށް އަމާޒުކޮށް ވަރުގަދަ ރޮކެޓް ޙަމަލާތަކެއް ދީފައެވެ. ޔަހޫދީންގެ ނިރުބަވެރި ފައުޖަށް ވަނީ ލުބްނާންގެ އިތުރު ސަރަޙައްދުތައް ފޭރިގަތުމަށް އަންގައިފައެވެ. ޔަހޫދީންގެ ޢަމަލުތައް ދުނިޔޭގެ އިންސާނީ ޙައްޤުތަކާބެހޭ ޖަމިއްޔާތަކުން ވަނީ ކުށްވެރިކޮށްފައެވެ.
