އައްޑޫ ސިޓީއަށް ނިސްބަތްވާ އެމްޑީޕީގެ ވަރުގަދަ ޓީމެއް ޕީޕަލްސް ނެޝަނަލް ކޮންގްރެސް (ޕީއެންސީ) އާއި ގުޅިވަޑައިގެންފިއެވެ.
މި ބޭފުޅުން ކޮންގްރެސް ޕާޓީއާ ގުޅިވަޑައިގެންފައިވަނީ، އެ ޕާޓީން ރޭ އާޓިފިޝަލް ބީޗު ސަރަޙައްދުގައި ”ދަ ގްރޭޓަރ އައްޑޫ“ ގެ ނަމުގައި މިރޭ ކުރިއަށްގެންދިޔަ ޖަލްސާގައެވެ. މި ބޭފުޅުންނަކީ އިދިކޮޅު އެމްޑީޕީގެ އިސް މަޤާމުތަކެއްވެސް ފުރުއްވާފައިވާ ބޭފުޅުންތަކެއްކަން ފާހަގަކޮށްލަންޖެހެއެވެ.
މި ޖަލްސާގައި ކޮންގްރެސް ޕާޓީއާ އަލަށް ގުޅިވަޑައިގަތް ބޭފުޅުންނަކީ:
- އައްޑޫ ސިޓީގެ އެމްޑީޕީގެ ކުރީގެ ރައީސް އަޙްމަދު އަދްހަމް
- އެމްޑީޕީގެ ފޭދޫ ދާއިރާގެ ކުރީގެ ރައީސް އަބްދުالله ސަޢީދު
- އެމްޑީޕީގެ ފޭދޫ ދާއިރާގެ ކުރީގެ ނާއިބު ރައީސް މުޙައްމަދު ސަޢީދު
- އެމްޑީޕީގެ ފޭދޫ ދާއިރާގެ ކުރީގެ ކައުންސިލަރު އަދި އެލްޖީއޭގެ ކުރީގެ މެންބަރު އަޙްމަދު މިރުޒާލް
- އެމްޑީޕީގެ އެކްޓިވިސްޓެއްގެ ގޮތުގައި ސްރީލަންކާގައި މީގެ ކުރިން ހަރަކާތްތެރިވި ފާތިމަތު ޝިޔާމާ
- އައްޑޫ ސިޓީގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގައި ތިންވަނަ ދައުރެއް ފުރިހަމަ ކުރަމުންދާ ޙައްވާ ޒާހިރާ
މި ބޭފުޅުން ކޮންގްރެސް ޕާޓީއާ ގުޅިވަޑާއިގަތުމާ ގުޅިގެން އެ ޕާޓީން ވަނީ ވަރަށް ހޫނު މަރުޙަބާ އެެއް ކިޔައިފައެވެ. އެ މެންބަރުން ވަނީ ޕާޓީއާ ގުޅޭ އިޤްރާރާއި މެންބަރޝިޕް ފޯމް ރައީސުލްޖުމްހޫރިއްޔާ އަދި ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒުއާ ހަވާލު ކުރައްވައިފައެވެ.
މި ޖަލްސާގައި، ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބުގައި އައްޑޫ ސިޓީގެ ގޮނޑިތަކަށް ކޮންގްރެސް ޕާޓީގެ ފަރާތުން ވާދަކުރާ ކެންޑިޑޭޓުން ވަނީ ތަޢާރަފުކޮށްފައެވެ. އިންތިޚާބުތަކަށް ތައްޔާރުވުމުގެ ގޮތުން ކޮންގްރެސް ޕާޓީން ވަރަށް ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލެވެއެވެ.
