ބޭނުންވާތަކެތި
ތައްޔާރުކުރަން ނަގާ ވަގުތު :30 މިނެޓް
ކުކުޅު މެރިނޭޓް ކުރުމަށް
200 ގްރާމް ބޯންލެސް ކުކުޅު (½ އިންޗި ކުދިކޮށް ކޮށާފައި)
1 މޭޒުމަތީ ސަމުސާ ތަންދޫރީ މަސާލާ
1 މޭޒުމަތީ ސަމުސާ ޕްލެއިން ޔޯގަޓް
2 ސައިސަމުސާ ޖިންޖަރ ގާލިކް ޕޭސްޓް
1 ސައިސަމުސާ ބޮޑު ލުނބޯ ހުތް
1 ސައިސަމުސާ އޮލިވް އޮއިލް
1 ސައިސަމުސާ ތެޅި މިރުސް
½ ސައިސަމުސާ މުގުރި ކޮތަނބިރި
½ ސައިސަމުސާ މުގުރި ދިރި
1 ސައިސަމުސާ ލޮނު
ކުޑަ ރަތް ކާ ކުލަ ކޮޅެއް
ތަންދޫރީ ޕިއްޒާ އަށް
1 މޭޒުމަތީ ސަމުސާ ޕިއްޒާ ސޯސް
1 މޭޒުމަތީ ސަމުސާ ޗިލީ ސޯސް
¼ ސައިސަމުސާ ހިކި އޮރެގާނޯ
1 ފިޔާ ( ބޮޑުކޮށް އަރިމަތިން ކޮށާފައި)
1 ޓޮމާޓޯ (ކިޔުބްކޮށް ކޮށާފައި)
މޮޒެރެއްލާ ޗީޒް (ގާނާފައި)
ކުޑަ އޮލިވް އޮއިލް ކޮޅެއް
ހަދާނެ ގޮތް
ބޯންލެސް ކުކުޅު (½ އިންޗި ކުދިކޮށް ކޮށާފައި)، ތަންދޫރީ މަސާލާ، ޕްލެއިން ޔޯގަޓް، ޖިންޖަރ ގާލިކް ޕޭސްޓް، ލުނބޯ ހުތް، އޮލިވް އޮއިލް، ތެޅި މިރުސް، މުގުރި ކޮތަނބިރި، މުގުރި ދިރި، ލޮނު އަދި ރަތް ކާ ކުލަ ކޮޅު ބޯތަށްޓަކަށް އަޅާލާށެވެ.
އެ ބޯތަށި ތެރެޔަށް ކޮށާފައިހުރި ކުކުޅުކޮޅު އަޅާލާފައި، ސަމުސަލަކުން ހުރިހާ ކުކުޅު ކޮޅެއްގައި ސޯސް ހޭކެންދެން ރަނގަޅަށް އެއްކޮށްލާށެވެ. ދެން ތަށީގެ މަތި ބަންދުކޮށްލާފައި އައިސްއަލަމާރީގައި އެއްރޭ ވަންދެން މެރިނޭޓުކުރަން ބަހައްޓާށެވެ.
އަވަން 200 ޑިގްރީ ސެލްސިއަސްގައި 5 މިނެޓު ވަންދެން ހޫނުކޮށްލާށެވެ. ތަބަކެއްގައި ބޭކިންގް ޕޭޕަރއެއް ނުވަތަ ފޮއިލް ކޮޅެއް އަޅާފައި ތައްޔާރުކުރި ތަންދޫރީ ކުކުޅުކޮޅު ފަތުރާލާށެވެ. އަވަނަށް ލާފައި ކުލަ ކުޑަކޮށް ގަދަ ވަންދެން ފިހެލާށެވެ.
މިވަގުތު ތަންދޫރީ ޕިއްޒާ ސޯސް ތައްޔާރުކޮށްލާށެވެ. ކުޑަ ބޯތަށްޓަކަށް، ޕިއްޒާ ސޯސް، ޗިލީ ސޯސް، ތަންދޫރީ މަސާލާ އަދި އޮރެގާނޯކޮޅު އަޅާފައި އެއްކޮށްލާށެވެ.
ކުކުޅުކޮޅު ފިހެވުނީމައި ޕިއްޒާއަށް އަޅަން ބޭނުންވާ ސައިޒަށް ކޮށާލާށެވެ. ތެއްޔަކަށް އޮލިވް އޮއިލްކޮޅު އަޅާލާށެވެ. ފިޔާ ކޮޅު އަޅާ މޯޅިވަންދެން ހާކާލާށެވެ. ޓޯމާޓޯކޮޅު އެއްކޮށްލާފަ މެދު ގިނީގައި ބަހައްޓައިން ދޭފަތުން ހާކާލާށެވެ. ރަނގަޅަށް މޯޅިވެލީމަ ތަންދޫރީ ކުކުޅުކޮޅު އަޅާފައި އެއްކޮށްލާށެވެ. އެއަށްފަހު އުންދުންމަތިން ބާލާށެވެ.
ޕިއްޒާފުށްގަނޑު މަތީގައި ތައްޔާރުކުރި ސޯސްކޮޅު އުނގުޅާލާފައި، މައްޗަށް މޮޒެރެއްލާ ޗީޒްކޮޅެއް ބުރުވާލާށެވެ. ތައްޔާރުކުރި މަސްކޮޅު ޕިއްޒާ ފުށްގަނޑުގެ މައްޗަށް އަޅާލާށެވެ. އަދި ޕިއްޒާ މަސްގަނޑު ފޮރުވޭވަރަށް މޮޒެރެއްލާ ޗީޒް އަޅާލާށެވެ. (ޓޮޕިންގ އަށް އޮލިވް ނުވަތަ ފިޔާވެސް ބޭނުން ކުރެވިދާނެއެވެ.)
އަވަން 200 ޑިގްރީ ސެލްސިއަސްއަށް ޖައްސާފައި 5 މިނެޓު ވަންދެން ހޫނުކޮށްލާށެވެ. އަވަނުގެ މެދަށް ޕިއްޒާ ލާފައި 15-10 މިނެޓު ވަންދެން ނުވަތަ ޗީޒް ދިޔާވެ ފުށްގަނޑަށް ރަން މުށި ކުލައެއް އަރަންދެން ފިހެލާށެވެ.
ޕިއްޒާ ރީތިކޮށް ފިހެވުނީމައި އަވަނުން ނަގާފައި 10 މިނެޓު ވަންދެން ހިހޫ ކުރަން ބައިންދާލާފައި، ޕިއްޒާ ކަޓަރ އަކުން ކަފާލާށެވެ.
