ތިމަންނާއަކީ ޔޫސުފްގެ ފާނު ކަމަށާއި ވަހީ އަންނަކަމަށްބުނެ ޓިކްޓޮކްގައި އިސްލާމްދީނަށް ފުރައްސާރަކުރަމުންދާ މީހާ ހޯދަން ދިވެހި ފުލުހުންގެ ޚިދުމަތުން އިޢުލާނުކޮށްފިއެވެ.
ފުލުހުން ބުނީ އިސްލާމްދީނަށް ތައުހީނުކޮށް ފުރައްސާރަކުރުމާއި، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމާއި، މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަަކައާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މަޢުލޫމާތު، ސޯސަލް މީޑިއާގެ ޕްލެޓްފޯމް ޓިކްޓޮކް މެދުވެރިކޮށް ފެތުރިކަމަށް ތުހުމަތު ކުރެވޭ މައްސަލައެއްގެ ތަހުގީގަށް މީހަކު ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ، ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް އަންގައި އިއުލާނުކޮށްފައިވާ ކަމަށެވެ.
އިސްލާމް ދީނަށް ފުރައްސާރަކޮށް ޓިކްޓޮކްގައި މި ޢަމަލުތައް ހިންގަމުންދަނީ ނ.ކުޑަފަރި، ހިޔަލީގެ / ޙުސައިން ޔޫސުފް (44އ) އެވެ. އޭނާ ފުލުހަށް ހާޒިރުކުރަނީ މައްސަލައިގެ ތަހުގީގަށް ތުހުމަތުގައި ސުވާލުކުރުމަށް ކަމަށް ފުލުހުން ވަނީ ހާމަކޮށްފައެވެ. އޭނާ ފުލުހަށް ހާޒިރުވާން އަންގާފައިވަނީ މާރޗު 18 ވަނަ ދުވަހުގެ 12:00 އަށެވެ.
ޓިކްޓޮކްގައި ހުސައިން ދީނުންބޭރުވެ، އިސްލާމް ދީނަށް ފުރައްސާރަކޮށް ހެދި މައްސަލަ ބަލަން އިސްލާމިކް މިނިސްޓްރީން ކަމާ ގުޅޭ އިދާރާތަކަށް ހުށަހެޅީ މީގެ 2 ހަފްތާ ކުރިންނެވެ.
އޭނާއަކީ ޔޫސުފްގެފާނުކަމަށް ދަޢުވާކޮށް، އޭނާއަށް މާތްﷲ ވަހީ ބާވާލައްވާފައިވާ ކަމަށާއި ވަހީ ބާއްވާލައްވަނީ ކީރިތި ރަސޫލާ ﷺ އަށް އެކަނި ނޫން ކަމަށް ބުނެ، އޭނާ ވަނީ ދީނަށް ފުރައްސާރަކޮށްފަ އެވެ. މިނޫނަސް ނަބިއްޔާ ﷺ އަށް ނިސްބަތްކޮށް ހަޑިހުތުރު އެތައް ވާހަކަތަކެއް އޭނާ ވަނީ ދައްކާފައެވެ.
