ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވަޢުދުފުޅާ އެއްގޮތަށް 1447 ވަނަ އަހަރުގެ ބަރަކާތްތެރި ރަމަޟާންމަހަށް ކޮންމެ ގޭބިސީއަކަށް ސަރުކާރުން ހަދިޔާކުރާ މަސްދަޅު ކޭސްތައް ބެހުމުގެ މަސައްކަތް ރޭ ނިންމާލާފައިވާ ކަމަށާއި، މި އަހަރު 113،382 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކްވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.
މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވަނީ މިހިނގާ 1447 ރަމަޟާން މަހު ރޯދަ ހަދިޔާ ބެހުމުގެ ކަންކަން ކުރިއަށް ދިޔަ ގޮތުގެ ތަފްސީލު މީޑިއާތަކާއި ހިއްސާކުރައްވާފައެވެ.
މިނިސްޓަރ ވިދާޅުވީ މާލޭ ސަރަޙައްދުގައި ރޯދަ ހަދިޔާ ބެހުމުގެ މަސައްކަތް ރޭ (15 ރަމަޟާން، 4 މާރިޗު 2026) ގެ ނިޔަލަށް ނިންމާލާފައިވާއިރު މާލޭ ސަރަޙައްދުން ދޫކުރެވިފައިވަނީ 55667 މަސްދަޅު ކޭސް ކަމަށެވެ.
އެ މަނިކުފާނު ވިދާޅުވީ މި އަހަރު ރޯދަ ހަދިޔާގެ ގޮތުގައި، އަތޮޅުތަކުގެ ގޭބިސީތަކަށް ބެހުމަށް ފޮނުވިފައިވަނީ، 57715 މަސްދަޅު ކޭސް ކަމަށެވެ. އެއާއެކު މުޅި ޖުމްލަ 113382 މަސްދަޅު ކޭސް ދޫކޮށްފައިވާ ކަމަށް މިނިސްޓަރ ވިދާޅުވިއެވެ.
ފާއިތުވި 2 އަހަރުގެ ތަސާސްހިސާބުތައް ހިއްސާކުރައްވަމުން މިނިސްޓަރ ވިދާޅުވީ ރޯދަ ހަދިޔާގެ ގޮތުގައި މި ދިޔަ އަހަރު އަތޮޅުތަކުގެ ގޭބިސީތަކަށް ބެހުމަށް 60712 ކޭސް ފޮނުވިފައި ވިޔަސް، މި އަހަރު އަތޮޅުތަކަށް ފޮނުވަން ޖެހުނީ 57715 ކޭސް ކަމަށެވެ. އެއީ 2997ގެ މަދުވުމެއް ކަމަށެވެ.
މީގެ އިތުރުން މި ދިޔަ އަހަރު މާލޭ ސަރަޙައްދަށް ދޫކުރެވިފައިވަނީ 50525 ކޭސް ކަމަށް ވިޔަސް، މި އަހަރު ދޫކުރެވިފައި ވަނީ 55667 ކޭސް ކަމަށެވެ. އެހެންކަމުން މިއީ 5142 ކޭހުގެ އިތުރު ވުމެއް ކަމަށް މިނިސްޓަރު ވިދާޅުވިއެވެ. 1446 ވަނަ އަހަރު ރޯދަ ހަދިޔާގެ ގޮތުގައި މުޅި ރާއްޖެއަށް ދޫކުރެވުނީ 111237 މަސްދަޅު ކޭހެވެ. މި އަހަރު އެ ޢަދަދުވަނީ 113382އަށް އަރާފައެވެ. މިއީ 2145 ކޭހުގެ އިތުރު ވުމެކެވެ.
މިއީ ރޯދަ ހަދިޔާ ޕްރޮގްރާމް ހިންގާ 3 ވަނަ އަހަރެވެ. މި ދިޔަ އަހަރެކޭ އެއްފަދައިން މި އަހަރު ވެސް ސަރުކާރުން ދޫކޮށްފައިވަނީ ދިވެހި ކޮންމެ ޢާއިލާއަކަށް 48 ދަޅުގެ މަސްކޭހެކެވެ.
ދިވެހި ގޭބިސީތަކަށް ދެއްވުމަށް ރައީސުލްޖުމްހޫރިއްޔާ ނިންމަވައިފައިވާ ރޯދަ ހަދިޔާ، ދޫކުރާނެ ގޭބިސީތައް އަތޮޅުތެރޭގެ ރަށްރަށުގައި ކަނޑައަޅައި އެ ލިސްޓްތައް ތައްޔާރު ކުރައްވާފައިވަނީ ކައުންސިލް އިދާރާތަކުންނެވެ. މާލޭ ސަރަޙައްދުގައި ގޭބިސީތައް ދެނެގަތުމަށް ޓަކައި އަސާސީ މަސްދަރެއްގެ ގޮތުގައި ބަލާފައިވަނީ، ސްޓެލްކޯގެ ޑޮމެސްޓިކް ކަރަންޓް މީޓަރެވެ.
މި އަހަރުގެ ރޯދަ ހަދިޔާ ޢާންމުކޮށް ބެހުމުގެ ޢަމަލީ މަސައްކަތް ފެށިފައިވަނީ 2026 ޖަނަވަރީ 24 ގައެވެ. މާލޭ ސަރަޙައްދުގައި 15 މަރުކަޒެއް ޤާއިމު ކުރެވި ރޯދަ ހަދިޔާ ދޫކުރެވުނެވެ.
