މާލެސިޓީ ކައުންސިލްގެ ގަލޮޅު މެދުދާއިރާގެ ކައުންސިލަރ އަދި ކުރިއަށްއޮތް ކައުންސިލް އިންތިޚާބުގައި ގަލޮޅު މެދު ދާއިރާއަށް ޕީއެންސީގެ ފަރާތުން ވާދަކުރައްވާ ކެންޑިޑޭޓް ރީހާން (ރީނު) ގެ ކެމްޕޭން ޖަގަހަ ހުޅުވުމުގެ ޙަފްލާގައި މާލެސިޓީގެ ކުރީގެ މޭޔަރު ޝިފާ މުޙައްމަދު ބައިވެރިވެ ވަޑައިގެންނެވުމާއިއެކު، އެމްޑީޕީއަށް ނިސްބަތްވާ ބައެއްފަރާތްތަކުން ރީނުއަށާއި، ޝިފާއަށް ނިސްބަތްކޮށް ބަހުގެ ހަމަލާތައް ދެމުން ދަނިކޮށް ޝިފާ މިކަމަށް ރައްދު ދެއްވައިފިއެވެ.
އެ ހަފްލާގައި ޝިފާ ބައިވެރިވެ ރީހާން އާއި ފަސްޓްލޭޑީ މެޑަމް ސާޖިދާއާ ސަލާމް ކުރާ ފޮޓޯއާއެކު އެމްޑީޕީގެ އެކްޓިވިސްޓުން ވަނީ ޝިފާވެސް އެމްޑީޕީ ދޫކޮށްލީ ކަމަށް ބުނެ ފާޑުކިޔުންތައް އަމާޒުކޮށްފަ އެވެ.
އަޅުގަނޱަށް ބޮޱުދައިތަ ކިޔާ ކުއްޖެއް. އޭނާގެ ޖަގަހަ ހުޅުވުމައް ދިޔުމުން ގިނަބަޔަކު ކަންބޮޱުވާކަށް ނުޖެހޭ. ގަލޮލުގެ ކުރިއަށް ގެންދަން ޖެހިފައިވާ ކަންކަން ކުރިއަށް ދާތަން ފެންނާތީ އުފާކުރަން. pic.twitter.com/cHVbDVM9jY
— Shifa Mohammed🎈🇵🇸 (@SifaMohammed) March 5, 2026
ޙަފްލާގެ ފޮޓޯއެއް ހިއްސާ ކުރައްވާ ރައްދުގައި ޝިފާ ވިދާޅުވީ އެ ޙަފްލާގައި އޭނާ ބައިވެރިވުމަކީ ބަޔަކު ކަންބޮޑުވާން ޖެހޭ ކަމެއް ނޫން ކަމަށާއި، ރީހާން އަކީ ޝިފާއަށް ބޮޑުދައިތަ ކިޔާ ކުއްޖެއް ކަމަށެވެ. މިއާއިއެކު ޝިފާ ވިދާޅުވީ ގަލޮލުގައި ކުރިއަށް ގެންދަން ޖެހިފައިވާ ކަންކަން ކުރިއަށް ދާތަން ފެންނާތީ އުފާކުރައްވާ ކަމަށްވެސް ވިދާޅުވެފައެވެ.
