ބޭނުންވާތަކެތި
ތައްޔާރުކުރަން ނަގާ ވަގުތު :15 މިނެޓް
މަންޗީ މާރީ ބިސްކިޓް (ޕެކެޓެއްގެ ދެބައި ކުޅާ އެއްބައި)
½ ސައިސަމުސާ އަންސޯލްޓެޑް ބަޓަރު (ތަބަކުގައި ހޭކުމަށް)
¼ ޖޯޑު އަންސޯލްޓެޑް ބަޓަރު
1 ދަޅު ގެރިކިރު
½ ޖޯޑު ކޮކޯ ޕައުޑަރ
1 ސައިސަމުސާ ވެނީލާ އެސެންސް
2 ސައިސަމުސާ ކޯން ފްލާ
ކެޑްބަރީ މިލްކް ޗޮކްލެޓް ( ގާނާފައި)
ޑާކް ޗޮކްލެޓް ( ކޮށާފައި)
ކެޝޫނަޓް (ރޯސްޓް ކޮށްލާފައި)
ކަނަމަދު ( މެދުން ފަޅާފައި)
ހަދާނެ ގޮތް
ފުރަތަމަ މަންޗީ މާރީ ބިސްކިޓް ފުނޑުކޮށްލާށެވެ. ފުނޑުވާނީ ކޮންމެހެން މާ ހިމުންނުވާ ވަރަކަށް ގާތްގަނޑަކަށް 1 ނުވަތަ ½ އިންޗި ބޮޑު މިނަށެވެ. ފުނޑުވާނީ މާ ބޮޑެތި އެތިކޮޅު ކޮޅު ނުހުންނާނެ ވަރަށެވެ.
ފަޖް ސެޓްކުރަން ބޭނުން ކުރާ ޓްރޭގެ އަރިމަތި ތަކުގައާއި ފުލުގައި އަންސޯލްޓެޑް ބަޓަރު އުނގުޅާށެވެ. ބަޓަރުގެ ބަދަލުގައި ބޭކިންގް ޕޭޕަރވެސް ބޭނުން ކުރެވިދާނެއެވެ.
ބޮޑު ތެއްޔަކަށް އަންސޯލްޓެޑް ބަޓަރު އަޅައި މަޑު ގިނީގައި 2 ނޫނީ 3 މިނެޓު ވަންދެން ނުވަތަ އެ ދިޔާ ވަންދެން ކައްކާށެވެ. ބަޓަރު ކޮޅު ދިޔާ ވީމައި ގެރިކިރާއި، ކޮކޯ ޕައުޑަރާއި، ވެނީލާ އެސެންސް، ތެއްޔަށް އަޅައި ހުއްޓާ ނުލާ ދޭފަތުން ހާކަމުން މަޑު ގިނީގައި ކައްކާށެވެ. ކައްކާނީ 3-4 މިނިޓު ވަންދެން ނުވަތަ ތެލީގައި ހުރި ތަކެތި އޮމާން ވެލަންދެންނެވެ.
ކޮށާފައި ހުރި ޑާކް ޗޮކްލެޓް ކޮޅު ތެއްޔަށް އަޅާލާފައި އެ ގިރިގެން ދަންދެން 30 ސިކުންތު ވަންދެން ނޫނީ 1 މިނެޓު ވަންދެން ނުވަތަ އެއްކޮށް ދިޔާވަންދެން އެއްކޮށްލާށެވެ. އެއަށްފަހު ފުނޑުކުރި ބިސްކޯދު އަޅާފައި 2 މިނެޓު ވަންދެން އެއްކޮށްލާށެވެ. ކޯން ފްލާ ކޮޅާއި ކުޑަ ކެޝޫނަޓްކޮޅެއްވެސް އޭގެ ތެރެއަށް އަޅާލާފައި އެއްކޮށްލާށެވެ. 1 މިނެޓް ވެލީމަ އުނދުން ނިވާލާފައި ކުރިން ތައްޔާރު ކުރި ތަބަކުގެ ތެރެއަށް ތެލީގައި ހުރި ސާމާނު އޮއްސާލާށެވެ. ތެލީގައި ހުރި ސާމާނު ނިކަން އަވަހަށް ސެޓް ވާނެއެވެ. އެހެންވީމައި މިކަން ކުރަން ވާނީ ނިކަން ހަލުވި ކޮށެވެ.
ތަބަކަށް އެޅުމަށްފަހު ސަމުސަލެއްގެ ނުފުށުން، ނުވަތަ ދޭފަތަކުން ވިޔަސް ޓްރޭއަށް އެޅި ސާމާނުގެ މަތި އޮމާން ކޮށްލާށެވެ. އޭގެ މައްޗަށް ކަނަމަދު ކޮޅާއި ކެޝޫނަޓް އަޅާލާފައި، ގޭނި ޗޮކްލެޓްކޮޅުވެސް އަޅާލާށެވެ. ދެން އެއްޗަކުން މަތި ނިވާ ކުރުމަށްފަހު ފްރިޖަށް ލާފައި ގާތްގަނޑަކަށް 2 ގަޑިއިރު ބަހައްޓާށެވެ. ރަނގަޅަށް ސެޓްވީމަ ފްރިޖުން ނަގާފައި ގޮޅި ގޮޅިއަށް ކަފާލާށެވެ.
