ހަނގުރާމަވެރި ސަރަޙައްދުތަކުގައި ތާށިވެފައި ތިބި ދިވެހިން ރާއްޖެއަށް ގެނައުމުގެ މަސައްކަތްތައް ކުރަމުން އަންނަކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.
މިނިސްޓަރު އިޙްސާން މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ދިވެހި ރައްޔިތުންގެ ތެރެއިން ހަނގުރާމަވެރި އެކިއެކި ސަރަޙައްދުތަކަށް ގޮސް ތާށިވެ އަނބުރާ ރާއްޖެއަށް ނާދެވި، އަދި މީގެ ތެރެއިން އެކި ގޮތްގޮތުން ބައިވެރިވެފައި ތިބި ފަރާތްތަކާއި ހަނގުރާމަތަކުގައި ބައިވެރިވުމަށް އެކުގައި ގެންދިޔަ ޢާއިލާގެ އެކި ފަރާތްތައް ރާއްޖެ ނާދެވި ހަނގުރާމަވެރި ސަރަޙައްދުގައި ތާށިވެފައި ތިބޭ ތިބުން ނިނުމަކަށް ގެނައުމަށް ރައީސުލްޖުމްހޫރިއްޔާ އަންގަވާފައިވާ ކަމަށެވެ.
އެފަދަ ފަރާތްތަކުން ވީ އެންމެ އަވަހަކަށް ރާއްޖެ ގެނެސް، ރާއްޖޭގެ މުޖަތަމަޢުއަށް ނެރުމުގެ ކުރިން ގެންދަންޖެހޭ ހުރިހާ ތަމްރީންތަކާއި ޕްރޮގްރާމްތައް ފުރިހަމަކުރުމަށްފަހު މުޖުތަމަޢު ތެރެއަށް ރީ-އިންޓްރޭޓްކުރަން ޖެހޭ ފަރާތްތައް ރީ-އިންޓްރޭޓްކުރަން ކުރުމުގެ މަސައްކަތް މިހާރު ކުރަމުން އަންނަކަމަށް މިނިސްޓަރު ވިދާޅުވިއެވެ.
އެގޮތުން މީގެ ކުރިން 23 ފަރާތެއް ރީ-އިންޓަގްރޭޓްކުރެވިފައިވާކަން ފާހަގަކުރައްވަމުން މިނިސްޓަރު ވިދާޅުވީ، މިހާރު ކުރިއަށްދަނީ ސީރިއާގެ ދެ ސަރަޙައްދެއްގައި ތިބި 60 އެއްހައި ދިވެހިން ރާއްޖެއަށް ގެނައުމުގެ މަސައްކަތާއި އެހެން ޤައުމުތަކުގައި ތާށިވެފައި ތިބި ދިވެހިން ގެނައުމުގެ މަސައްކަތްތައް ކުރިއަށްދާ ކަމަށެވެ.
މި މަސައްކަތް ކުރިއަށް ދަނިކޮށް އަޅުގަނޑުމެންނަށް ލިބުނު މަޢުލޫމާތަކީ ތުރުކީގައި ދިވެހިރާއްޖޭގެ ތިން ރަށްޔިތަކު މިފަދަ ހަނގުރާމައިގައި ބައިވެރިވުމަށް އެހެން ޤައުމަކަށް ގޮސް ފަހުން ތުރުކީއަށް ހިޖުރަކުރެވި، އެތަނުގެ ތެރޭގައި ތާށިވެފައިވާކަމުގެ މަޢުލޫމާތު، އަދި ތުރުކީގެ ސަރުކާރުގެ ފަރާތުން އެ ފަރާތްތައް ޑީޓެއިންކޮށް، ދިވެހި ސަރުކާރަށް އެންގުމާ އެކުގައި، އަޅުގަނޑުމެންގެ ގުޅިފައިވާ އެކިއެކި މުއައްސަސާތައް މެދުވެރިވެގެން، އެ ފަރާތްތައް ރާއްޖެއަށް ގެނައުމަށް ވާނީ މަސައްކަތްތަކެއްކޮށްފަ،“ – މިނިސްޓަރު އިޙްސާން ވިދާޅުވިއެވެ.
އެގޮތުން ޢުމުރުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެއަށް ގެނެސް އެ ދެމީހުންނަށް ނެޝަނަލް ރީ-އިންޓަގްރޭޓިވް ފެސިލިޓީގައި ދޭންޖެހޭ ޚިދުމަތްތައް މިހާރު ދެމުން އަންނަކަމަށް މިނިސްޓަރު ވަނީ ފާހަގަކުރައްވައިފައެވެ.
