ޢުމްރާގެ އަޅުކަމަށް ގެންދާނެ ކަމަށްބުނެ އެތައް ބަޔަކުއަތުން ފައިސާނެގުމަށްފަހު ޢުމްރާގެ އަޅުކަމަށް ނުގެންދިޔުމުން އަލް އަބްރާރް ޙައްޖު އެންޑް ޢުމްރާ ނަމަކަށް ކިޔާ ގުރޫޕް ސަސްޕެންޑް ކޮށްފިއެވެ.
އެ ގްރޫޕުން މީހުން އަތުން ފައިސާ ނެގުމަށްފަހު ޢުމްރާގެ އިންތިޒާމްތައް ހަމަޖައްސައި ނުދިނުމުން ސަރުކާރުގެ އެހީގައި ޙައްޖުކޯޕަރޭޝަނުން ވަނީ އެމީހުން ޢުމްރާއަށް ފޮނުވާފައެވެ.
މިކަމާގުޅޭގޮތުން އިސްލާމިކް މިނިސްޓްރީން ނެރުނު ބަޔާނެއްގައި ބުނީ މާރޗް މަހުގެ 3 ކުން 26 އަށް ޢުމްރާއަށް ދިއުމަށް އެ ގްރޫޕުން ތައްޔާރުވެފައި މަޤުބޫލު އުޒުރެއްނެތި އެ ދަތުރު ކެންސަލްކޮށްފައިވާކަން މިނިސްޓްރީ އިން ބެލި ބެލުމުން ފާހަގަވެފައިވާ ކަމަށެވެ. އެހެންކަމުން ޢުމްރާއަށް މީހުން ގެންދިއުމުގައި ޢަމަލުކުރަންޖެހޭ އުސޫލުތަކާއި އަބްރާރް ގުރޫޕުން ޚިލާފުވެފައިވާތީ، ޢުމްރާއަށް މީހުން ގެންދިއުމަށް އެ ގްރޫޕަށް ދޫކުރެވިފައިވާ ހުއްދަ ބާޠިލުކޮށްފައިވާކަމަށް މިނިސްޓްރީން ވަނީ ބުނެފައެވެ.
މީގެ އިތުރުން މި މައްސަލައާއި ގުޅިގެން ބަލަންޖެހޭ އެންމެހާ ކަންކަން ބެލުމަށްފަހު، އަޅަންޖެހޭ ހުރިހާ ފިޔަވަޅެއްވެސް އެ ގްރޫޕާއި ދެކޮޅަށް އަޅާނެކަމުގެ ޔަޤީންކަން އިސްލާމިކް މިނިސްޓްރީން ވަނީ ދެއްވާފައެވެ.
މިނިސްޓްރީގެ ބަޔާނުގައި ބުނީ މިކަމުގެ ސަބަބުން ޢުމްރާއަށް ނުދެވުނު ފަރާތްތަކަށް އެހީތެރިވުމުގެ ކަންކަމުގައު މިނިސްޓްރީގެ ފަރާތުން އިންތިޒާމްތައް ހަމަޖައްސައިދެއްވާނެ ކަމަށެވެ.
މޯލްޑިވްސް ޙައްޖު ކޯޕަރޭޝަނުން ޖާގަ އޮތް މިންވަރުން އޭގެތެރެއިން 28 މީހަކަށް ވިސާ ޖަހައި މައްކާ އަދި މަދީނާއިން އެކޮމޮޑޭޝަން، އަދި ކެއިންބުއިމާއި ދަތުރުފަތުރުގެ އެންމެހާ އިންތިޒާމުތައް، ވަނީ ހަމަޖައްސައިދީފައެވެ. މޯލްޑިވްސް ޙައްޖު ކޯޕަރޭޝަނުން މި 28 މީހުން ސައުދީޢަރަބިއްޔާއަށް ޢުމްރާގެ އަޅުކަމަށް ފުރުވާލީ މޯލްޑިވިއަންގެ ފްލައިޓަކުން ކަމަށް ޙައްޖު ކޯޕަރޭޝަންގެ އެމްޑީ ޝަކީލް ވިދާޅުވިއެވެ.
އެކޯޕަރޭޝަނުން ނެރުނު ބަޔާނެއްގައި ވިދާޅުވީ ޢުމްރާވެރިންނަށް މި ފުރުޞަތު ހޯއްދަވައި ދެއްވާ އިންތިޒާމްތައް ހަމަޖައްސައި ދެއްވުމަށް ރައީސް ޑރ. މުޢިއްޒު އެދިވަޑައިގެންނެވި ކަމަށެވެ.
