ސަރުކާރުގެ ”ބޯހިޔާވަހިކަން އެންމެންނަށް“ މި ސިޔާސަތުގެ ދަށުން، އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ހުށަހެޅޭގޮތަށް އިޞްލާޙުތަކެއް ކޮންސްޓްރަކްޝަން މިނިސްޓްރީން ގެނެސްފިއެވެ.
މި ބަދަލާއި ގުޅިގެން ކޮންސްޓްރަކްޝަން މިނިސްޓްރީން ނެރެފައިވާ އިޢުލާނެއްގައި ބުނެފައިވަނީ، ގޯއްޗަށް އެދި ފޯމު ހުށަހެޅުމުގެ ފުރުޞަތު މި މަހުގެ 8 ވާ އާދީއްތަ ދުވަހުގެ ހެނދުނު 11:00 އިން ފެށިގެން އަންނަ އެޕްރީލް މަހުގެ 30 ވާ ބުރާސްފަތި ދުވަހުގެ ރޭގަނޑު 23:59 ގެ ނިޔަލަށް އޮންނާނެ ކަމަށެވެ.
ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ "ގޯތިގެދޮރު" ޕްރޮގްރާމުގެ ދަށުން ގޯއްޗަށް އެދި ފޯމު ހުށަހެޅުމަށް ހުޅުވާލުމާއި ގުޅޭ
އިއުލާނު: https://t.co/xfe2XMc3Kr
އުސޫލު: https://t.co/tyYfcN2Sbw pic.twitter.com/BCf5ujJQM2— Ministry of Construction, Housing & Infrastructure (@MoCImv) March 4, 2026
މި އުޞޫލުގެ ދަށުން ޖުމްލަ 1،250 އަކަފޫޓުގެ ގޯތި ރަސްމާލެއިން ދޫކުރުމަށް ވަނީ ހަމަޖެހިފައެވެ. އުޞޫލުގައި ހިމެނޭ މައި ކެޓަގަރީތަކަކީ، ކެޓަގަރީ-1 މާލޭ ރަށްވެހިންނާއި، ކެޓަގަރީ–2 މާލޭގައި ދިރިއުޅޭ އެހެން ރަށްރަށުގެ ރަށްވެހިންނެވެ. މި ކެޓަގަރީގެ ދަށުން 1،250 އަކަފޫޓުގެ ގޯތި ދޫކުރުމަށް ހަމަޖެހިފައިވާއިރު، މި ގޯތިތައް ދޫކުރާނީ ރަސްމާލެއިން ކަމަށް ކޮންސްޓްރަކްޝަން މިނިސްޓްރީން ވަނީ ބުނެފައެވެ.
މި އުޞޫލުގެ ދަށުން ބޯހިޔާވަހިކަމަށް އެދި އެޕްލިކޭޝަން ހުށަހަޅާނީ https://boahiyaavahikan.housing.gov.mv ޕޯޓަލް މެދުވެރިކޮށެވެ.
މި އިޢުލާނާ ގުޅޭ އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން އެ މިނިސްޓްރީގެ ހޮޓްލައިން ނަންބަރު 4004860, 4004861, 4004862, 4004863, 4004864 ނުވަތަ 4004865 ގުޅައި މަޢުލޫމާތު ސާފުކުރުމަށް ވަނީ އެދިފައެވެ. އަދި އެ މިނިސްޓްރީގެ އީމެއިލް
hotline@infrastructure.gov.mv އަށް މެއިލް ކޮށްގެންވެސް މަޢުލޫމާތު ސާފުކުރެވޭނެ ކަމަށް އެ މިނިސްޓްރީން ވަނީ ބުނެފައެވެ.
