އިޒުރޭލާއި އެމެރިކާ އިސްވެ ހުރެ އީރާނަށް ދިން ހަމަލާތަކުގައި އެ ޤައުމުގެ ރޫޙާނީ ލީޑަރު އާޔަތުުﷲ ޢަލީ ޚާމަނާއީ އަވަހާރަވުމާއި ގުޅިގެން ރޫޙާނީ ލީޑަރުކަމަށް އެމަނިކުފާނުގެ ދަރިކަލުން މުޖްތަބާ ޚާމަނާއީ އަޢްޔަންކުރަން ނިންމައިފިއެވެ.
މިކަމާ ގުޅިގެން އީރާނުގެ ނޫހެއް ކަމަށްވާ ”އީރާން އިންޓަނޭޝަނަލް“ އިން ރިޕޯޓްކޮށްފައިވާ ގޮތުގައި، އީރާނުގެ އެސެމްބްލީ އޮފް އެކްސްޕާޓްސް އިން މިހާރު ވަނީ މުޖްތަބާ ޚާމަނާއީ އީރާނުގެ އައު ރޫޙާނީ ލީޑަރުގެ ގޮތުގައި އިންތިޚާބުކޮށްފައެވެ. ޢުމުރުން 55 އަހަރުގެ މުޖުތަބާ ޚާމަނާއީ އަކީ އީރާނުގެ ވެރިކަމުގެ ނިޒާމުގައި އެންމެ ނުފޫޒު ގަދަ ބޭބޭފުޅުންގެ ތެރެއިން އެއް ބޭފުޅެވެ. މީގެ އިތުރުން އޭނާއަކީ ބައްޕާފުޅު ޚާމަނާއީ ފަދައިން ދީނީ ޢިލްމުގައިވެސް އަރާ ހުންނެވި ބޭފުޅެކެވެ.
މުޖްތަބާ ޚާމަނާއީ، އޭނާގެ ބައްޕާފުޅުގެ މަޤާމަށް އަޢްޔަންކުރަން ނިންމީ އެ ސަބަބަށްޓަކައި ކަމުގައިވުން އެކަށީގެންވެއެވެ. ނަމަވެސް ބައެއް ފަރާތްތަކުން ބުނާ ގޮތުގައި މުޖްތަބާ އެ މަޤާމަށް އަޢްޔަންކުރެވުނީ، އީރާނުގެ ސިޔާސީ އަދި އަސްކަރީ ކަންކަމުގައި ނުފޫޒުގަދަ ބޭފުޅެއްގެ ގޮތުގައި އޭނާ ފާހަގަކުރެވިފައިވާތީއެވެ.
އީރާން އިންޓަނޭޝަނަލްއިން ރިޕޯޓް ކޮށްފައިވާ ގޮތުގައި، މުޖްތަބާ ޚާމަނާއީ އެ މަޤާމަށް އަޢްޔަންކުރަން ނިންމީ އިޒުރޭލާއި އެމެރިކާ އިސްވެ އީރާނަށް ދިން ހަމަލާތަކުގައި އާޔަތުﷲ ޢަލީ ޚާމަނާއީ އަވަހާރަވުމާއި ގުޅިގެން އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އަށް އަންނަ ޕްރެޝަރާ ހުރެއެވެ. ބެލެވޭ ގޮތުގައި އީރާނުން މިކަން އިޢުލާން ކުރާނީ ޚާމަނާއީގެ ޖަނާޒާއަށް ފަހުގައެވެ.
