މާލޭ ސިޓީގެ ކުރީގެ މޭޔަރު ޝިފާ މުޙައްމަދު، ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ޕީއެންސީއަށް ތާއީދުކުރަން ނިންމަވައިފިއެވެ. އެގޮތުން މާލޭ ސިޓީގެ ގަލޮޅު އުތުރަށް ޕީއެންސީން ވާދަކުރައްވާ ރީޙާން ނާޡިމްގެ ކެމްޕޭން އޮފީސް ހުޅުވުމުގެ ޙަފްލާގައި ޝިފާ ބައިވެރިވެވަޑައިގަންނަވާ ތާއީދުކުރައްވާކަން ހާމަކުރައްވާފައެވެ.
ފާހަގަކޮށްލެވޭ ގޮތުގައި ގަލޮޅު އުތުރު ދާއިރާއަށް ޕީއެންސީގެ ފަރާތުން މި ފަހަރު ވާދަކުރާ ކެންޑިޑޭޓް، ރީޙާންއަކީ ގަލޮޅު މެދު ދާއިރާގެ މިހާރުގެ ކައުންސިލަރުވެސް މެއެވެ. ރީޙާން އެ ގޮނޑިއަށް އިންތިޚާބުވެފައިވަނީ އެމްޑީޕީގެ ކައުންސިލް މެންބަރެއްގެ ގޮތުގައި ނަމަވެސް، އެންމެ ފަހުން މާލޭ ސިޓީގެ މޭޔަރަކު ހޮވުމަށް ބޭއްވި އިންތިޚާބުގެ ތެރޭގައި އޭނާ ވަނީ ޕީއެންސީއަށް ސޮއިކޮށްފައެވެ.
ޝިފާ ފަދަ މާލޭ ސިޓީގެ މޭޔަރުކަން ކުރިން ކުރައްވާފައިވާ ބޭފުޅެއްގެ ތާޢީދު، މާލޭ ސިޓީގެ މޭޔަރު ކަމަށް ޕީއެންސީގެ ފަރާތުން މި ފަހަރު ވާދަކުރައްވާ ކެންޑިޑޭޓު މޫސާ ޢަލީ ޖަލީލަށާއި ކައުންސިލް މެންބަރު ކަމަށް ވާދަކުރާ ކޭންޑިޑޭޓް ރީޙާންއަށް ލިބުމަކީ އެ ޕާޓީގެ ކެމްޕޭނު ހަރަކާތްތަކަށް ލިބިގެންދިޔަ ވަރަށް ބޮޑު ކުރިއެރުމެއްގެ ގޮތުގައި ގިނަ ބަޔަކު ދެކެއެވެ.
