ގޯއްޗާއި ފްލެޓް ލިބޭނެ ކަމަށް ބުނެ ސްކޭމެއް ހިންގަމުންދާތީ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާންސްޓްރަކްޗަރ އިން ސަމާލުވާން އެދިއްޖެއެވެ.
މިކަކާ ގުޅިގެން ކޮންސްޓްރަކްޝަން މިނިސްޓްރީން ނެރެފައިވާ އިޢުލާނެއްގައި ބުނެފައިވަނީ، ސަރުކާރުން ހިންގާ ބޯހިޔާވަހިކަމުގެ މަޝްރޫޢުގެ ތެރެއިން، ބިންވެރިޔާ ސްކީމްގެ ދަށުން ދޫކުރާ ގޯއްޗާއި، ގެދޮރުވެރިޔާ ސްކީމްގެ ދަށުން ދޫކުރާ ފުލެޓްތައް ލިބޭނެ ކަމަށް ބުނެ، އެކި ފަރާތްތަކުން ޢާންމުންގެ އަތުން ފައިސާ ނަގަމުންދާ ކަމުގެ މަޢުލޫމާތު އެ މިނިސްޓްރީއަށް ލިބިފައިވާ ކަމަށެވެ.
ނޫސްބަޔާން:
ބިމާއި ފުލެޓު ލިބޭނެ ކަމަށް މިނިސްޓްރީގެ ނަމުގައި ހިންގަމުންދާ މުޢާމަލާތްތަކާ ގުޅޭ pic.twitter.com/nCrxyU0LVy— Ministry of Construction, Housing & Infrastructure (@MoCImv) March 3, 2026
ކޮންސްޓްރަކްޝަން މިނިސްޓްރީން ބުނީ، ބޯހިޔާވަހިކަމުގެ ހުރިހާ މަޝްރޫޢުތަކެއްގައި ވެސް ގޮއްޗާއި ފުލެޓް ދިނުމުގެ މަސައްކަތް ކުރިއަށްދާނީ ދިވެހި ސަރުކާރުގެ ގެޒެޓުގައި ޝާއިޢުކޮށް ޢާންމުކޮށްފައިވާ އުޞޫލުތަކާއި އިޖުރާއަތްތަކުގެ އިތުރުން މިނިސްޓްރީން އާންމުކުރަމުންދާ އިޢުލާންތަކުގައިވާ ގޮތުގެ މަތިން ކަމަށެވެ.
މިގޮތަށް ދިވެހި ސަރުކާރުގެ ގެޒެޓުގައި ޢާންމުކޮށްފައިވާ އުޞޫލުތަކާ ނުވަތަ އެ މިނިސްޓްރީން ޢާންމުކޮށްފައިވާ އިޢުލާނަކާ ޚިލާފަށް، އެއްވެސް ފަރާތަކަށް، ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ބޯހިޔާވަހިކަމުގެ އެއްވެސް މަޝްރޫޢަކުން ގޯއްޗާއި ފުލެޓް ލިބުމުގެ ފުރުޞަތު ނޯންނާނެ ކަމަށް ކޮންސްޓްރަކްޝަން މިނިސްޓްރީން ވަނީ ބުނެފައެވެ.
މީގެ އިތުރުން އެކި ފަރާތްތަކުން ހިންގާ މިފަދަ އޮޅުވާލުންތަކާއި ސްކޭމްތަކަށް ޢާންމު ރައްޔިތުން ސަމާލުވުމަށް ކޮންސްޓްރަކްޝަން މިނިސްޓްރީން ވަނީ އެދިފައެވެ. އަދި ސަރުކާރުން ހިންގާ ޕްރޮގްރާމުގެ ދަށުން ދޫކުރާ ގޯތި ނުވަތަ ފުލެޓް ހޯދުމުގެ ގޮތުން އެއްވެސް ފަރާތަކާ ފައިސާގެ ނުވަތަ އެފަދަ އެއްވެސް މުޢާމަލާތެއް ނުކުރުމަށްވެސް އެ މިނިސްޓްރީން ވަނީ އެދިފައެވެ.
އަދި އެފަދަ މުޢާމަލާތެއް ކޮށްފިނަމަ ނުވަތަ އެފަދަ މަޢުލޫމާތެއް ލިބިއްޖެނަމަ ލަސްނުކޮށް ފުލުހުންނަށް އެކަން އެންގުމަށް ކޮންސްޓްރަކްޝަން މިނިސްޓްރީން ވަނީ އެދިފައެވެ.
