ކުދި އާބާދީތަކުގެ ކައުންސިލްތަކުގައި މަސައްކަތް ކުރާނެ އިދާރީ މުވައްޒަފުން ނުލިބޭ މައްސަލަ ޙައްލުކުރާނެ ކަމަށް ސިޓީސް މިނިސްޓަރު އާދަމް ޝަރީފް ޢުމަރު ވިދާޅުވެއްޖެއެވެ.
މިނިސްޓަރު އާދަމް ޝަރީފް މި މޭރުމުން ވިދާޅުވީ، ރާއްޖޭގެ އާބާދީ އެންމެ މަދު އެއް ރަށް ކަމަށްވާ ވ. ރަކީދޫ ކައުންސިލުގެ އިދާރީ މުވައްޒަފުންނާއި ތިން ކައުންސިލް މެންބަރަކު އިސްތިޢުފާ ދިނުމާއި ގުޅިގެން، ރައްޔިތުންނަށް ލިބެންޖެހޭ ޚިދުމަތްތައް ނުލިބޭތީ، އެ ރަށު ރައްޔިތުން ނިކުމެ ކައުންސިލް އިދާރާ ބަންދުކުރުމާއި ގުޅިގެން އެކްސްގައި ޙިއްޞާކުރެއްވި ޕޯސްޓެއްގައެވެ.
ފަތުރުވެރިކަމާއި އެނޫންވެސް އިޤުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އަންނަނީ އިތުރުވަމުން.
މި މައްސަލަ ހައްލު ކުރުމަށް ގުޅުންހުރި މުއައްސަސާތަކާއެކު މިދަނީ މަސައްކަތް ކުރަމުން.…— Adam Shareef Umar (@Adamshareefz) March 2, 2026
މިނިސްޓަރު ޝަރީފް ކުރެއްވި ޕޯސްޓުގައި ވިދާޅުވީ، ފަތުރުވެރިކަމާއި އެނޫންވެސް އިޤުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އެއްދުވަހުން އަނެއް ދުވަހަށް އިތުރުވަމުން އަންނަކަން ފާހަގަކުރެވިފައިވާ ކަމަށެވެ.
މި މައްސަލަތައް ދިމާވުމަށް މެދުވެރިވާ ސަބަބުތައް ދެނެގަނެ، މި މައްސަލަ ޙައްލު ކުރުމަށް ކަމާ ގުޅުންހުރި މުއައްސަސާތަކާއެކު މިހާރު މަސައްކަތް ކުރަމުން އަންނަ ކަމުގައިވެސް މިނިސްޓަރު ވަނީ ވިދާޅުވެފައެވެ.
ފާހަގަކޮށްލެވޭ ގޮތުގައި މިދިޔަ 2025 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވ. އަތޮޅުގެ މީހުން ދިރިއުޅޭ ރަށްތަކަށް ކުރެއްވި ދަތުރުފުޅުގެ ތެރެއިން އެ އަތޮޅު ރަކީދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި އެ ރަށުގެ ގިނަ ބަޔަކު ބޭނުންވަނީ އެހެން ރަށަކަށް ހިޖުރަކުރުމަށް ކަމަށް އެ ރަށު ރައްޔިތުން ވަނީ ހާމަކޮށްފައެވެ.
