މެދުއިރުމަތީގައި މިހާރު ހިނގަމުން އަންނަ ހަނގުރާމައިގެ ސަބަބުން ރާއްޖެއިން ނުފުރި ތާށިވެފައި ތިބި ފަތުރުވެރިންގެ ވިސާގެ މުއްދަތު މޯލްޑިވްސް އިމިގްރޭޝަނުން އިތުރުކޮށްދީފިއެވެ.
މިކަން ހާމަކޮށް އިމިގްރޭޝަނުން އެކްސްގައި ޙިއްޞާކުރި ޕޯސްޓެއްގައި ބުނެފައިވަނީ، ދަތުރުފަތުރުގެ ނިޒާމަށް މި ވަގުތު ކުރިމަތިވެފައިވާ ބުރޫތަކުގެ ސަބަބުން، ދަތުރުކުރުމުގައި ދަތިތަކާ ކުރިމަތިލާންޖެހިފައިވާ ފަތުރުވެރިންނަށް ދޫކޮށްފައިވާ ވިސާގެ މުއްދަތު އިތުރުކޮށްދިނުމަށް ނިންމާފައިވާ ކަމަށެވެ.
⚠️ ދަތުރުފަތުރުގެ ނިޒާމަށް މިވަގުތު ކުރިމަތިވެފައިވާ ބުރޫތަކުގެ ސަބަބުން، ދަތުރުކުރުމުގައި ދަތިތަކާ ކުރިމަތިލާންޖެހިފައިވާ ފަތުރުވެރިންނަށް ދޫކޮށްފައިވާ ވިސާގެ މުއްދަތު އިތުރުކުރުމަށް ވަނީ ނިންމާފައި.
⚠️ In response to ongoing travel disruptions, a decision has been made to… pic.twitter.com/jvVxIf617t
— Maldives Immigration (@ImmigrationMV) March 2, 2026
މިދިޔަ ފެބްރުއަރީ މަހުގެ 28 ވަނަ ދުވަހު މެދު އިރުމަތީގައި ފެށުނު ހަނގުރާމައިގެ ސަބަބުން ދަތުރުފަތުރުގެ ނިޒާމަށް ވަނީ ވަރަށް ބޮޑަށް ބުރޫ އަރައިފައެވެ. އެގޮތުން ރާއްޖެއަށް ދަތުރުކުރާ މެދުއިރުމަތީގެ އެއަރލައިންތަކުގެ ފްލައިޓްތައް ވަކިން ޚާއްޞަކޮށް ޤަަތަރު އެއަރވޭސް އަދި އެމިރޭޓްސް ފަދަ އެއަރލައިންތަކުން ރާއްޖެއަށް ކުރަމުން ދިޔަ ދަތުރުތައް ވަނީ މެދުކަނޑާލައިފައެވެ.
ފާހަގަކޮށްލެވޭ ގޮތުގައި މިނިސްޓްރީ އޮފް ޓްރާންސްޕޯރޓް އެންޑް ސިވިލް އޭވިއޭޝަނުން ވަނީ ރާއްޖެއަށް ޒިޔާރަތްކުރާ ފަތުރުވެރިންނަށާއި ރާއްޖެއިން ބޭރަށް ދަތުރުކުރާ ދިވެހިންނަށް ފުރުމުގައި ދިމާވެދާނެ ދަތިތައް ޙައްލުކޮށްދިނުމުުގެ ގޮތުން، ދެކުނު އިރުމަތީ އޭޝިއާ، ދެކުނު އޭޝިއާގެ އިތުރުން އިންޑިއާގެ އެއަރލައިންތަކުން ފަތުރުވެރިންގެ ދަތުރުފަތުރުގެ ކަންކަން ހަމަޖެއްސުމަށްޓަކައި އެ ފަރާތްތަކާ މަޝްވަރާވެސް ކުރަމުންނެވެ.
