މީސް މީޑިއާގެ އެކި މަންސަތަކުގައި، ފާޅުކަން ބޮޑުގޮތެއްގައި އިސްލާމްދީނަށް ފުރައްސާރަކުރާ ޓިކްޓޮކްގައި މަޝްހޫރު އަޙުމަދު އާމިރު ނުވަތަ ”ބޫގާ“ ކޮންގްރެސް ޕާޓީއަށް ތާއީދުކޮށް ވާހަކަދައްކަނީ އަމިއްލައަށް ކަމަށާއި، އޭނާ ދައްކާ ވާހަކަތަކަކީ ކޮންގްރެސް ޕާޓީއާއި އެއްވެސް ގުޅުމެއް އޮތް ކަމެއްނޫން ކަމަށް ޕީއެންސީން ބުނެފިއެވެ.
މިކަމާ ގުޅިގެން އެޕާޓީން މިއަދު އެކްސްގައި ޚިއްޞާކޮށްފައިވާ ޕޯސްޓެއްގައި ބުނެފައިވަނީ އިސްލާމްދީނަށް ފުރައްސާރަކުރުމުގެ ތުހުމަތުގައި ފުލުހުން ހޯދަމުންދާ މީހަކު، ޕީއެންސީގެ ކެންޑިޑޭޓުންނަށް ތާއީދުކޮށް މީސް މީޑިއާގައި ވާހަކަދައްކާފައިވުމަކީ، އެޕާޓީއާއި އެއްވެސް ރަސްމީ ގުޅުމެއް އޮތް ކަމެއްނޫން ކަމުގައި ދަންނަވާ ކަމަށެވެ. ޕީއެންސީން ބުނެފައިވަނީ، އިސްލާމްދީނަށް ފުރައްސާރަ ކުރުން ފަދަ ޢަމަލުތައް އެޕާޓީން އެންމެ ހަރުކަށި ޢިބާރާތުން ކުށްވެރިކުރާ ކަމަށެވެ.
އިސްލާމްދީނަށް ފުރައްސާރަ ކުރުމުގެ ތުހުމަތުގައި ފުލުހުން ހޯދަމުންދާ މީހަކު، ޕީއެންސީގެ ކެންޑިޑޭޓުންނަށް ތާއީދުކޮށް ސޯޝަލް މީޑިއާގައި ވާހަކަދައްކާފައިވުމަކީ، މި ޕާޓީއާ އެއްވެސް ރަސްމީ ގުޅުމެއް އޮތް ކަމެއް ނޫންކަމުގައި ދަންނަވަމެވެ.
އިސްލާމްދީނަށް ފުރައްސާރަކުރުން ފަދަ…
— PNC Secretariat (@pnc_secretariat) March 1, 2026
ފާހަގަކޮށްލެވޭ ގޮތުގައި، ދިވެހި ފުލުހުންގެ ޚިދުމަތުން ”ބޫގާ“ ހޯދަން އިޢުލާންކުރުމާއިއެކު، އޭނާއަކީ ޕީއެންސީއަށް ތާއީދުކުރާ މީހެއް ކަމަށް ދައްކައި، ޢާންމުންނަށް އޮޅުވާލައި، ޕީއެންސީގެ އަގު ވައްޓާލުމަށް އޭނާ ވަނީ މަސައްކަތްކޮށްފައެވެ.
ޚާއްޞަކޮށް ޕީއެންސީގެ ޓިކެޓުގައި މާލޭ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓް މޫސާ ޢަލީ ޖަލީލަށް ތާއީދުކުރާ ކަމަށް ބުނެ ޕީއެންސީގެ ހުއްދައެއްނެތި އެޕާޓީގެ ކެމްޕޭނު ޕޯސްޓަރުތައް ބޭނުންކޮށްގެން ”ބޫގާ“ ދަނީ މީސް މީޑިއާގައި އެކިކަހަލަ ވީޑިއޯތައް ޢާންމުކުރަމުންނެވެ. އޭނާ މިކަން ފަށާފައިވަނީ އިސްލާމްދީނަށް ފުރައްސާރަކުރި މައްސަލައިގައި ފުލުހުން އޭނާ ހޯދައި، ތަޙުޤީޤަށް ހާޒިރުކުރުމަށް އެންގުމުން އެކަމުގެ ރުޅީގައި ކަމަށް ބެލެވެއެވެ.
މިކަމާއި ގުޅިގެން ”އެކިއެމްވީ“ އިން ކުރި ސުވާލެއްގެ ޖަވާބުގައި ޕީއެންސީގެ ކެމްޕޭން ޓީމުގެ އިސް އޮފިޝަލަކު ވިދާޅުވީ، އެއީ ޕީއެންސީގެ ތާއީދުއޮވެގެން ނުވަތަ ޕީއެންސީއަށް އެނގިގެން ހިނގާ ކަމެއް ނޫން ކަމަށާއި، އެއީ އޭނާގެ އަމިއްލަ ޚިޔާލުކަމަށެވެ. އަދި އިސްލާމްދީނަށް ފުރައްސާރަ ކުރާ އެއްވެސް ބަޔަކާއެކު ޕީއެންސީން މަސައްކަތް ނުކުރާނެކަމުގެ ޔަޤީންކަންވެސް އޭނާ ވަނީ ދެއްވާފައެވެ.
