މެދުއިރުމަތީގައި ހިނގަމުން އަންނަ ހަމަނުޖެހުންތަކުގެ ސަބަބުން ސަޕްލައި ޗެއިނަށް ދިމާވެދާނެ ގޮންޖެހުންތައް މޮނިޓާކޮށް، ރައްޔިތުންނަށް ކާބޯތަކެއްޗާއި އަސާސީ ބާވަތަތައް މެދުކެނޑުމެއްނެތި ލިބޭނެކަން ކަށަވަރު ކުރުމަށް މަސައްކަތް ކުރަމުން އަންނަ ކަމަށް އިކޮނޮމިކް މިނިސްޓަރީން ބުނެފިއެވެ.
އެ މިނިސްޓްރީން ނެރުނު ބަޔާނެއްގައި ބުނީ، މެދުއިރުމަތީގެ މަސްރަހަށް އަންނަމުންދާ ބަދަލުތަކުގެ ސަބަބުން ރާއްޖެއަށް ކޮށްފާނެ އަސަރުތައް ދައުލަތުގެ ކަމާގުޅުން ހުރި އިދާރާތަކާ ގުޅިގެން ވަރަށް ގާތުން ބަލަމުންދާ ކަމަށެވެ. ވަކިން ހާއްސަކޮށް ބައިނަލްއަގުވާމީ މުދާ އުފުލުމުގެ ނިޒާމަށް އަތުވެދާނެ ލޮޅުންތަކާއި، ރާއްޖެއަށް އާންމުކޮށް މުދާ އެތެރެކުރާ މަގުތަކަށް ދިމާވެދާނެ ގޮންޖެހުންތައް ދިރާސާކުރަމުންދާ ކަމަށް އެ މިނިސްޓްރީން ބުނެފައިވެއެވެ.
މުދާ އެތެރެކުރުމުގައި ދަތިތަކެއް ކުރިމަތިވެދާނެ ހާލަތަކަށް ތައްޔާރުވުމުގެ ގޮތުން، ރާއްޖެއަށް މުދާ އެތެރެކުރެވިދާނެ އިތުރު މާކެޓުތަކާއި ބަދަލު މަގުތައް ހޯދުމުގެ މަސައްކަތް މިހާރު މިނިސްޓަރީން ވަނީ ފަށާފައެވެ. މީގެ ބޭނުމަކީ ދުނިޔޭގެ މަސްރަހަށް ކޮންމެ ފަދަ ބަދަލެއް އައި ނަމަވެސް، ރާއްޖޭގެ ބާޒާރުން ކާބޯތަކެއްޗާއި އަސާސީ މުދާ ހުސްނުވެ ލިބޭނެ ގޮތް ހެދުން ކަމަށް ބަޔާނުގައި ވަނީ ބުނެފައެވެ.
”މި ދަނޑިވަޅުގައި ސަރުކާރުގެ އެންމެ އިސް އަމާޒަކީ ދިވެހި ރައްޔިތުންނަށް ބޭޏުންވާ ކާބޯތަކެއްޗާއި އަސާސީ މުދަލުގެ ރައްކާތެރިކަން ކަށަވަރުކޮށްދިނުމެވެ. އެގޮތުން ރާއްޖެއަށް ބޭނުންވާ މުހިންމު ބާވަތްތަކުގެ ސްޓޮކް ހުސްނުވެ ލިބޭޏެ އިންތިޒާމުތައް ހަމަޖެއްސުމަށާއި އިމްޕޯޓް ކުރުމުގައި ހުރި ގޮންޖެހުންތަކަށް ހައްލު ހޯދުމަށް ސަރުކާރުގެ މުއައްސަސާތަކާއި އަމިއްލަ ވިޔަފާރިތަކާއި ގުޅިގެން އަޅަންޖެހޭ އެންމެހައި ފިޔަވަޅުތައް އަޅާނެ ކަމުގެ ފުރިހަމަ ޔަގީންކަން ރައްޔިތުންނަށް އަރުވަމެވެ.“ ބަޔާނުގައި ބުނެފައިވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ އެންމެ އިސް އަމާޒަކީ ރައްޔިތުންނަށް ބޭނުންވާ އަސާސީ މުދަލުގެ ރައްކާތެރިކަން ކަށަވަރުކޮށްދިނުން ކަމަށް މިނިސްޓްރީން ފާހަގަކުރިއެވެ. އެގޮތުން، މުހިންމު ބާވަތްތަކުގެ ސްޓޮކް ދެމެހެއްޓުމަށާއި، އިމްޕޯޓް ކުރުމުގައި ދިމާވާ ގޮންޖެހުންތަކަށް ހައްލު ހޯދުމަށް ކުރަންޖެހޭ ހުރިހާ މަސައްކަތެއް ކުރާނެ ކަމުގެ ފުރިހަމަ ޔަގީންކަން ސަރުކާރުން ވަނީ ރައްޔިތުންނަށް އަރުވާފައެވެ.
