މެދު އިރުމަތީގައި މިހާރު ހިނގަމުން އަންނަ ހަމަނުޖެހުންތަކާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޒީރުންގެ ކޮމިޓީއެއް އެކުލަވާލައްވައިފިއެވެ.
މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސް ޕާސަން އަދި އެންސްޕާގެ ސީއީއޯ ހީނާ ވަލީދެވެ. އެގޮތުން ހީނާ ދާދި ދެންމެއަކު އެކްސްގައި ޙިއްޞާކުރެއްވި ޕޯސްޓެއްގައި ވިދާޅުވެފައިވަނީ، މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތަކާއި ކުރިމަތިވާ ކަންކަން ޙައްލުކުރުމަށް ގުޅިގެން ފިޔަވަޅުތައް އެޅުމަށް ރައީސުލްޖުމްހޫރިއްޔާ މިއަދު މެންދުރުފަހު ވަޒީރުންގެ ޚާއްޞަ ކޮމިޓީއެއް އުފައްދަވާފައިވާ ކަމަށެވެ.
މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތަކާއި ކުރިމަތިވާ ކަންކަން ޙައްލުކުރުމަށް ގުޅިގެން ފިޔަވަޅުތައް އެޅުމަށް ރައީސުލްޖުމްހޫރިއްޔާ މިއަދު މެންދުރުފަހު ވަޒީރުންގެ ޚާއްސަ ކޮމިޓީއެއް އުފައްދަވައިފި.
މިކޮމިޓީގައި…— Heena Waleed (@MvSpokesperson) February 28, 2026
މިކޮމިޓީގައި ހިމެނިވަޑައިގަންނަވާ ބޭފުޅުންނަކީ:
- ފޮރިން މިނިސްޓަރު ޑރ. ޢަބްދުﷲ ޚަލީލް (ކޮމިޓީގެ ޗެއަރ)
- ޑިފެންސް މިނިސްޓަރު މުޙައްމަދު ޣައްސާން މަޢުމޫން
- ފިނޭންސް މިނިސްޓަރު މޫސާ ޒަމީރު
- އިކޮނޮމިކް މިނިސްޓަރު މުޙައްމަދު ސަޢީދު
- ޓްރާންސްޕޯރޓް މިނިސްޓަރު މުޙައްމަދު އަމީން
- ހޯމް މިނިސްޓަރު ޢަލީ އިޙްސާން
- ޓޫރިޒަމް މިނިސްޓަރު ޠާރިޤު އިބްރާހީމް
- ހަޔަރ އެޑިއުކޭޝަން މިނިސްޓަރު ޑރ. ޢަލީ ހައިދަރު
- އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު
ހީނާ ވިދާޅުވީ އެ މިނިސްޓްރީތަކުން ކަމާގުޅޭ އެންމެހައި މަޢުލޫމާތުތަކެއް ރައްޔިތުންނާއި ހަމައަށް ޙިއްޞާކުރަމުން ގެންދާނެ ކަމަށެވެ.
މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން އެ ސަރަހައްދުގައި އުޅޭ ހުރިހާ ދިވެހިން ވީ އެންމެ އަވަހަކަށް އެންމެ ކައިރީގައި ހުރި ރާއްޖޭގެ އެމްބަސީ އެއްގައި ރަޖިސްޓްރީވުމަށް ރާއްޖޭގެ ފޮރިން މިނިސްޓްރީންވެސް ވަނީ އިލްތިމާސްކޮށްފައެވެ. އަދި މިވަގުތު ހަނގުރާމައިގެ ޙާލަތު ގޯސްވެފައިވާ މެދު އިރުމަތީގެ އެކި ޤައުމުތަކުގައި ދިރިއުޅޭ ދިވެހިންގެ ކަންކަން ވަރަށް ގާތުން ބަލަމުން އަންނަ ކަމަށްވެސް ފޮރިން މިނިސްޓްރީ އިން ވަނީ ބުނެފައެވެ.
މެދުއިރުމަތީގެ މަސްރަހު ހޫނުވެފައި ވަނީ އިސްރާއީލާއި، އެމެރިކާއިން އީރާނަށް ހަމަލާ ދޭން ފެށުމުންނެވެ. އީރާނުންވެސް ރައްދު ހަމަލާތައް މިހާރު ދެމުން އަންނައިރު، މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށްވެސް އީރާނުގެ ހަމަލާތައް އަމާޒު ކުރަމުން ދެއެވެ.
