އިޒުރޭލާއި އެމެރިކާ ގުޅިގެން އީރާނަށް މިހާރު ދެމުންގެންދާ ހަމަލާތަކުގައި އީރާނުގެ ރޫޙާނީ ލީޑަރު އާޔަތުﷲ ޢަލީ ޚާމަނާއީ އަވަހާރަކޮށްލާފައިވާ ކަމަށްބުނެ ޔަހޫދީންގެ މީޑިއާތަކުގައި ފަތުރަމުން އަންނަނީ ދޮގެއްކަން ފަޅައި އަރައިފިއެވެ.
އިޒުރޭލުގެ މި ވާހަކަތައް ދޮގުކުރަމުން އީރާނުން ބުނެފައިވަނީ، އިޒުރޭލާއި އެމެރިކާ އިން އީރާނަށް އަމާޒުކޮށް ދިން ހަމަލާތަކުގައި ރޫޙާނީ ލީޑަރު އާޔަތުﷲ ޢަލީ ޚާމަނާއީ އަވަހާރަކޮށްލާފައިވާ ކަމަށް ދެކެވޭ ވާހަކަތަކަކީ ދޮގެއް ކަމަށާއި، އަދި ޚާމަނާއީގެ ޙާލުކޮޅުވެސް މާތްﷲ ގެ އިރާދަފުޅާއިއެކު ރަނގަޅު ކަމަށެވެ.
މިކަމާ ގުޅިގެން އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، އެޤައުމުގެ ހުރިހާ އިސް ފަރާތްތަކެއް ވެސް ހެޔޮ ޙާލުގައި ސަލާމަތުން އެބަތިބި ކަމަށެވެ.
ފާހަގަކޮށްލެވޭ ގޮތުގައި އިޒުރޭލުގެ މީޑިއާތަކުން އަންނަނީ ރޫޙާނީ ލީޑަރު ޚާމަނާއީގެ އިތުރުން އީރާނުގެ ރައީސް މަސްޢޫދު ޕެޒެޝްކިއާން އަވަހާރަކޮށްލާފައިވާ ކަމަށްބުނެ ދޮގު ޚަބަރުތައް ފަތުރަމުންނެވެ. ނަމަވެސް އެ ދެބޭފުޅުންވެސް މިހާރު ތިއްބެވީ ރައްކާތެރި ސަރަޙައްދުތަކުގައި ކަމަށް އީރާނުގެ މީޑިއާތަކުން ވަނީ ކަށަވަރުކޮށްދީފައެވެ.
މިހަމަލާތަކުގައި ރޫޙާނީ ލީޑަރު ޚާމަނާއީގެ އޮފީސް ހިމެނޭ ސަރަޙައްދަށް އިޒުރޭލުން މިސައިލް ހަމަލާތަކެއް ދީފައިވީ ނަމަވެސް އެ ވަގުތު ޚާމަނާއީ ތެހެރާނުގައިވެސް ނޫޅުއްވައެވެ. މީގެ އިތުރުން ތެހެރާނުގައި ހުންނަ އީރާނުގެ ރައީސް މަސްޢޫދު ޕެޒެޝްކިއަން ދިރިއުޅުއްވާ ރިޔާސީ ގަނޑުވަރަށް އަމާޒުކޮށް ދިން ހަމަލާތަކުގައި އެމަނިކުފާނަށްވެސް އެއްވެސް ގެއްލުމެއް ލިބިވަޑައިގެންފައެއްނުވެއެވެ.
