އިޒުރޭލާއި އެމެރިކާ ގުޅިގެން އީރާނަށް ދިން ހަމަލާތަކާއެކު، ރައްދުގައި އީރާނުން ދޭން ފެށި މިސައިލް ހަމަލާތަކާ ގުޅިގެން މުޅި މެދު އިރުމަތީގެ ވައިގެ ސަރަޙައްދު ބަންދުކޮށް، އެއަރލައިންތަކުން ކުރާ ދަތުރުތައް ކެންސަލްކޮށްފިއެވެ.
ގަލްފް ނިއުސްގައި ރިޕޯޓުކޮށްފައިވާ ގޮތުގައި އީރާނުގެ މި ރައްދު ހަމަލާތަކުގެ ސަބަބުން ގަލްފްގެ ގިނަ ޤައުމުތަކުން ވަނީ އެޤައުމުތަކުގެ ވައިގެ ސަރަޙައްދު ބަންދުކޮށްފައެވެ. އޭގެތެރޭގައި ޔޫއޭއީ، ޤަތަރު، ކުވައިތު، ބަޙްރެއިންގެ އިތުރުން ޢިރާޤުން ވަނީ އެޤައުމުތަކުގެ ވައިގެ ސަރަޙައްދު ބަންދުކޮށްފައެވެ.
އީރާނުގެ ރައްދު ހަމަލާތަކާއި ގުޅިގެން މުޅި މެދު އިރުމަތީގެ ވައިގެ ދަތުރުތަކައް ވަނީ ބުރޫ އަރައިފައެވެ. ވައިގެ ސަރަޙައްދު ބަންދުކުރުމާއި ގުޅިގެން އެއަރލައިންތަކަށް ވަނީ ފްލައިޓުތައް ކެންސަލް ކުރަން މަޖުބޫރުވެފައެވެ. ދަތުރުތައް މެދުކަނޑާލި އެއާލައިންތަކުގެ ތެރޭގައި އެމިރޭޓްސް އަދި ޤަތަރު އެއަރވޭސް ހިމެނެއެވެ.
މެދު އިރުމަތީގެ ޙާލަތު މިހާ ސީރިއަސް ޙާލަތަކަށް ވެއްޓިފައިމިވަނީ އެމެރިކާ އަޑީގައި އޮވެގެން އިޒުރޭލުން އީރާނަށް ހަމަލާތައް ދިނުމާއި ގުޅިގެންނެވެ. އިޒުރޭލުގެ މި ހަމަލާތަކާއި ގުޅިގެން އީރާނުން ވަނީ ރައްދުގައި ހަނދާނުން ނުފިލާނެވަރުގެ ވަރުގަދަ ހަމަލާތަކެއް ދޭނެ ކަމަށް ބުނެފައެވެ. އެގޮތުން އީރާނުގެ ޤާނޫނު ހަދާ މަޖިލީހުގެ ޤައުމީ ސަލާމަތާ ބެހޭ ކޮމިޝަންގެ ވެރިޔާ އިބްރާހިމް ޢަޒީޒީ ވިދާޅުވީ ”އަހަރެމެން ކަލޭމެނަށް އިންޒާރު“ ދީފައިވާނެ ކަމަށާއި ދެން ”އަހަރެމެން ނުހުއްޓުވޭނެ“ ކަމަށެވެ.
އަލް-ޖަޒީރާގައި ރިޕޯޓް ކޮށްފައިވާ ގޮތުގައި، މެދު އިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި އެމެރިކާއާއި ގުޅުން ހުރި ތަންތަނަށް އަމާޒުކޮށް އީރާނުން ރައްދުގައި ވަނީ މިސައިލް އަދި ޑްރޯން ހަމަލާތަކެއް އަމާޒުކޮށްފައެވެ. އެގޮތުން، ޤަތަރާއި، ޔޫއޭއީ، ބަޙްރެއިން، ކުވައިތު، ސޫރިޔާ، ޢުރުދުންގެ އިތުރުން ޢިރާޤުގައި ހުންނަ މިފަދަ ތަންތަން ހިމެނެއެވެ.
އިޒުރޭލުން އީރާނަށް ދިން ހަމަލާތަކުގައި މިހާތަނަށް 50 އަށްވުރެ ގިނަ މީހުން ޝަހީދުވެފައިވާ ކަމަށް އަލް-ޖަޒީރާގައި ރިޕޯޓް ކޮށްފައިވެއެވެ. އީރާނުގެ ރައްދު ހަމަލާތަކުގައި އިޒުރޭލުން މަރުވެފައިވާ މީހުންގެ އަދަދެއް އަދި ސާފެއްނުވެއެވެ.
