އެމެރިކާ އަޑީގައި އޮވެގެން އިޒުރޭލުން އީރާނަށް މިހާރު ދެމުން އަންނަ ހަމަލާތަކުގައި އީރާނުގެ ރޫޙާނީ ލީޑަރު އާޔަތުﷲ ޢަލީ ޚާމަނާއީގެ އޮފީސް ހިމެނޭ ސަރަޙައްދަށް ޔަހޫދީ އިޒުރޭލުން މިސައިލް ހަމަލާތަކެއް ދީފިއެވެ.
ދަ އެސޯސިއޭޓެޑް ޕްރެސް ނިއުސް އޭޖެންސީން ރިޕޯޓް ކޮށްފައިވާ ގޮތުގައި، އީރާނުގެ ވެރިރަށް ތެހެރާނުގައި ހުންނަ އެޤައުމުގެ ރޫޙާނީ ލީޑަރު އާޔަތުالله ޢަލީ ޚާމަނާއީގެ އޮފީސް ހިމެނޭ ސަރަޙައްދަށް އިޒުރޭލުން މިސައިލް ހަމަލާތައް އަމާޒުކުރި ވަގުތު ޚާމަނާއީ ތެހެރާނުގައި ވެސް ނޫޅުއްވާ ކަމަށެވެ.
ޚާމަނާއީ މިހާރު ހުންނެވީ ރައްކާތެރި ސަރަޙައްދަގައި ކަމަށާއި، ނަމަވެސް ޚާމަނާއީ ހުންނެވީ ސީދާ ކޮން ތަނެއްގައި ކަމެއް ނޭނގޭ ކަމަށް ދަ އެސޯސިއޭޓެޑް ޕްރެސް ނިއުސް އޭޖެންސީން ވަނީ ރިޕޯޓް ކޮށްފައެވެ.
ފާހަގަކޮށްލެވޭ ގޮތުގައި، އިޒުރޭލުން އީރާނަށް މިހާރު ދެމުން އަންނަ ހަމަލާތަކުގައި ތެހެރާނުގައި ހުންނަ އީރާނުގެ ރައީސް މަސްޢޫދު ޕެޒެޝްކިއަން ދިރިއުޅުއްވާ ރިޔާސީ ގަނޑުވަރަށް ވަނީ ހަމަލާތަކެއް އަމާޒުކޮށްފައެވެ. މިއީ ރައީސް މަސްޢޫދު ޕެޒެޝްކިއަން އަވަހާރަކޮށްލުމުގެ ނިޔަތުގައި އިޒުރޭލާއި އެމެރިކާ ގުޅިގެން، ދުރާލާ ރާވައިގެން ދީފައިވާ ހަމަލާތަކެއް ކަމަށްވާއިރު، އިޒުރޭލުގެ މި ހަމަލާތަކުގައި ރައީސް މަސްޢޫދު ޕެޒެޝްކިއަން އަވަހާރަވެފައިވާ ކަމުގެ އެއްވެސް މަޢުލޫމާތެއް އަދި ލިބިފައެއްނުވެއެވެ.
