އިޒްރޭލާއި އެމެރިކާ ގުޅިގެން އީރާނަށް ވަރުގަދަ މިސައިލް ހަމަލާތަކެއް ދޭން ފަށައިފިއެވެ.
އިޒުރޭލުން އީރާނަށް މިހާރު ދެމުން އަންނަ ހަމަލާތަކުގައި ތެހެރާނުގައި ހުންނަ އީރާނުގެ ރައީސް މަސްޢޫދު ޕެޒެޝްކިއަން ދިރިއުޅުއްވާ ރިޔާސީ ގަނޑުވަރަށް ވަނީ ހަމަލާތަކެއް އަމާޒުކޮށްފައެވެ. މިއީ ރައީސް މަސްޢޫދު ޕެޒެޝްކިއަން އަވަހާރަކޮށްލުމުގެ ނިޔަތުގައި އިޒުރޭލާއި އެމެރިކާ އިން ގުޅިގެން، ދުރާލާ ރާވައިގެން ދީފައިވާ ހަމަލާތަކެއް ކަމަށް ބެލެވެއެވެ.
މީގެ އިތުރުން ދަ އެސޯސިއޭޓެޑް ޕްރެސް ނިއުސް އޭޖެންސީން ރިޕޯޓްކޮށްފައިވާ ގޮތުގައި އީރާނުގެ ވެރިރަށް ތެހެރާނުގައި ހުންނަ އެޤައުމުގެ ރޫޙާނީ ލީޑަރު އާޔަތުالله ޢަލީ ޚާމަނާއީގެ އޮފީސް ހިމެނޭ ސަރަޙައްދަށް ވެސް އިޒުރޭލުން ވަނީ ހަމަލާތަކެއް އަމާޒުކޮށްފައެވެ. އިޒުރޭލުގެ ހަމަލާތައް ޚާމަނާއީގެ އޮފީސް ހިމެނޭ ސަރަޙައްދަށް އަމާޒުވީ ވަގުތު ޚާމަނާއީ ތެހެރާނުގައި ނެތް ކަމަށާއި އޭނާ މިހާރު ވަނީ ރައްކާތެރި ތަނަކަށް ގެންގޮސްފައި ކަމަށް ރޮއިޓާސްއާ ޙަވާލާދީ އޮފިޝަލަކު ވަނީ ވިދާޅުވެފައެވެ.
އީރާނުގެ ނޫސް އޭޖެންސީއެއް ކަމަށްވާ ތަސްނިމް އިން ރިޕޯޓް ކޮށްފައިވާ ގޮތުގައި ތެހެރާންގެ އުތުރުގެ ސައްޔިދް ޚާންދާން ސަރަޙައްދަށް ވެސް އިޒުރޭރުން ވަނީ ހަމަލާ ދީފައެވެ.
އިޒުރޭލާއި އެމެރިކާ ގުޅިގެން އީރާނަށް މިހާރު ދެމުން ގެންދާ ހަމަލާތަކާއި ގުޅިގެން އިޒްރޭލުގެ ޑިފެންސް މިނިސްޓަރު އިސްރާއީލް ކާޓްޒް ބުނެފައިވަނީ، އިޒްރޭލުން އިސްވެ ތިބެ އީރާނަށް މިސައިލް ހަމަލާތައް އަމާޒުކޮށްފައިވަނީ އީރާނުގެ ސަބަބުން އިޒުރޭލަށް އޮތް ނުރައްކާ ނައްތާލުމަށެވެ.
އެމެރިކާގެ އޮފިޝަލަކު އަލްޖަޒީރާއަށް މަޢުލޫމާތު ދީފައިވާ ގޮތުގައި، އިޒުރޭރުން އީރާނަށް ހަމަލާ ދިނީ އީރާނުގެ ނިއުކްލިއާ ޕްރޮގްރާމާ ގުޅޭ ގޮތުން އެއްބަސްވުމަކަށް އައުމަށް އިޒްރޭލާއި އެމެރިކާ ގުޅިގެން ހިންގި އަސްކަރީ އޮޕަރޭޝަނެއްގެ ތެރެއިން ކަމަށެވެ.
އިޒްރޭލުން މިހާރު ވަނީ އީރާނުން ރައްދުގައި ހަމަލާ ދީފާނެކަމަށް ބުނެ، ކުއްލި ނުރައްކަލުގެ ޙާލަތު އިޢުލާން ކޮށްފައެވެ. އަދި މިހާރު ޢާންމުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް އިޒުރޭލުން މިހާރު ދަނީ ކުރަމުންނެވެ. މީގެ އިތުރުން ސަލާމަތީ ސަބަބުތަކަށްޓަކައި އިޒްރޭލުގެ އެއަރޕޯޓްސް އޮތޯރިޓީން ވަނީ ވައިގެ ދަތުރުތައް ނުކުރަން އަންގައި އެއަރޕޯޓުތައް ވެސް ބަންދުކޮށްފައެވެ.
